Qarabağ cəbhəsində baş verənlər və ondan sonra cərəyan edən proseslər müxtəlif aspektlərdə müzakirə olunmaqdadır. İctimai-siyasi düşərgədə Qarabağ ətrafında gedən proseslərlə bağlı fərqli mövqelər var.

MHP sədri Samir Turan Cəfərov reyting.az-a deyib ki, üç günlük müharibəni bəlli səbəblərdən dayandırmağımız bir daha sübut etdi ki, ermənilər atəşkəs rejiminə həmişəki kimi əməl etmək niyyətində deyillər: "Torpaqları işğal olunan bizik, əslində atəşkəs bizim xeyrimizə deyil. Lakin 25 ildir ki, Azərbaycan yenə də müharibə etmədən, insanların məhv olmaması üçün sülh yoluna üstünlük veməkdədir. Fəqət, ermənilərin sülh yolu ilə bu məsələnin həllinə birmənalı şəkildə yaxın durmamaları bizə bir yol qoyub - Müharibə!

Qarabağ hadisəsi münaqişə deyil. Münaqişə - əgər İrəvanda türklər də yaşasaydı, ermənilərlə türklər arasında savaş başlasaydı, yaxud da Ermənistan müdaxilə etməsəydi, Qarabağdakı ermənilərlə türklər arasında savaş olsaydı, onda buna münaqişə deyərdilər və hər iki dövlət, beynəlxalq təşkilatlar araya girib bu məsələni - münaqişəni həll etməyə çalışardılar. Kiprdəki və yaxud digər regionlardakı kimi. Biz buna necə və niyə münaqişə deməliyik? Bu, görünən və görünməyən tərəfləriylə müharibədir. Öncə Qərbi Azərbaycandan soydaşlarımızı bir nəfərə kimi deportasiya ediblər, sonra da Azərbaycanın ortasında əbədi-əzəli torpaqlarımızı - Qarabağı, digər rayonlarımızı işğal ediblər. Torpaqları işğal olunan biz, uduzan biz, sülh yoluna gəlməyən Ermənistan".

Partiya sədri onu da nəzərə çatdırıb ki, torpaqlarımızın sülh yolu ilə qaytarılacağına inanmır. Onun fikrincə, başqasının torpaqlarını işğal edən dövlət sülh anlamaz. Anlasaydı, zatən başqa dövlətin torpağına soxulmazdı:

"Bunun bir yolu var - müharibə edib torpaqlarımızı, hətta Zəngəzur da daxil olmaqla, almalıyıq.

Sualınızın özündə bu cavab var. Bu problemi yaradan da, davam etdirən də, bizə mane olan da Rusiyadır. Bunu hətta uşaqlar da bilir. Rusiyaya inanıb, etibar etməklə bu məsələnin həlli mümkün deyil. Mümkün olsa belə, Rusiya Azərbaycan üzərinə elə ağır şərtlər qoyar, elə boyunduruğa keçərik ki, sovet dönəmimizə şükür etməli olarıq. Müstəqilliyimiz isə bizim üçün ən böyük nemətdir".