"Ermənistan Azərbaycanı dəstəkləyən dövlətləri də təxribata çəkir”.

Bu sözləri Milli Məclisin sədr müavini Bahar Muradova deyib.

Ermənistan konstruktiv mövqe nümayiş etdirmədiyini,təmas xəttində təxribatlar törətdiyini bildirənB.Muradova xatırladıb ki, aprelin əvvəlində ermənilər təxribata əl atıb, Azərbaycan ordusu isə buna layiqli cavab verib:

"Ermənilər bunu etməklə özlərinə problem yaratdılar. Bu müharibədə Azərbaycan imkanlarını bir daha ortaya qoydu. Ordumuzun güclü olduğu sübuta yetirildi. Düzdür, Azərbaycan da itki verdi. Amma biz bütövlükdə üstünlük qazandıq”.

Vitse-spiker qeyd edib ki, münaqişənin həlli ilə bağlı səylərin artdığı bir məqamda Ermənistanın təmas xəttində törətdiyi təxribat hər kəsə məlumdur.
"2014-cü ildən bu yana Azərbaycanı və bizi dəstəkləyən region ölkələrini təxribata çəkmək istiqamətində addımlar atılır. Azərbaycan ərazisində Ermənistanın hərbi kontingentinin iştirakı ilə təlimlər keçirilir, işğal altındakı ərazilərdə mədəni abidələr məhv edilir, "Dağlıq Qarabağ Respublikası”nın tanıtdırılması istiqamətində səylər göstərilir.
Ermənistan tərəfi ardıcıl olaraq məqsədyönlü şəkildə Azərbaycanı və ölkəmizi dəstəkləyən dövlətləri provokasiyaya çəkmək, yenidən təcavüskar siyasətə davam etmək istiqamətində addımlar atır və Azərbaycan ərazisində erməni hərbçilərin iştirakı ilə təlimlər keçirilir".

B.Muradovanın sözlərinə görə, aprelin ayının 2-dən başlayan Ermənistan silahlı bölmələrinin təxribatları nəticəsində insanlar həlak olub, ekologiya, ətraf mühit üçün zərərli sayılacaq hadisələr baş verib.
"Azərbaycan ordusunun bölmələri bu təxribatın qarşısını almaq üçün əks-hücuma keçdi, bir sıra yüksəkliklər geri alındı. Ermənistan ordusu və onların yaratdığı istehkamların keçilməz olduğu barədə miflər dağıldı. Ermənistanın təcavüzkar rəhbərliyi üçün də arzuedilməz proseslər başlayıb. Dağlıq Qarabağda artıq əhali arasında münaqişənin lazım olmadığı haqda fikirlər səslənir. Bu münaqişəni başlatmaqla Ermənistan Dağlıq Qarabağdakı əhali üçün problemlər yaradıb, onların gələcəyə ümidi qalmayıb. Vəziyyətin bu şəkildə davam etməsi mümkün deyil”.