ADP İdarə Heyətinin növbəti toplantısı keçirilib. Toplantıda ölkədə günbəgün dərinləşən total iqtisadi böhran müzakirə edilib.

Partiyadan strateq.az-a daxil olan məlumata görə, toplantıda ölkədə işsizliyin böyük sürətlə artması, əhalinin böyük hissəsinin yoxsulluq həddinə düşməsi və iqtisadi böhranın sosial böhrana keçmə təhlükəsinin riskli olduğu qeyd edilib. Toplantıda hökumətin anti-böhran tədbirlərinin real vəziyyətə adekvat olmadığı qeyd edilib və hakimiyyəti radikal siyasi-iqtisadi islahatlara başlamağa çağrılıb.

İdarə Heyəti manatın üzən məzənnəyə keçməsindən sui-istifadə hallarının getdikcə artmasından narahat olduğunu bildirib.

"Belə ki, Milli Bank müəmmalı şəkildə ölkə əhalisinin böyük əksəriyyətini məlumatlandırmadan qeyri-müəyyən səbəblərdən bir neçə dəfə qısa müddətə manatın məzənnəsini əvvəlki kursa uyğun endirmişdir. Bu əməliyyat işbazların milyonlarla dollar qazanması üçün edildiyinə şübhə yaradır. Buna paralel olaraq Milli Bank valyuta bazarına yüz milyon dollarla xarici valyutanı qeyri-aşkarlıq şəraitində satışa çıxarımışdır ki, bu da dollar qıtlığına təsir etməmişdir. Faktlar onu göstərir ki, həmin əməliyyatın xüsusi şəxslərin maraqlarına uyğun şəkildə həyata keçirildiyinə şübhə yaradır. Elə buna görə də ADP prokurorluq orqanlarını hər iki faktı araşdıraraq xalqa bu barədə məlumat verməyə çağırır".

İdarə Heyəti Zərdab rayonun sabiq müstəntiqi R.Səfərovun tutduğu vəzifəsindən istefa verdikdən və hakimiyyətin ünvanına sərt çıxışlar etdikdən sonra onun haqqında həbs qətimkan tədbiri seçilməsi ilə bağlı məsələyə münasibət bildirib, həbsin siyasi motivli olduğunu diqqətə çatdırıb.Hakimiyyətdən isəAzərbaycana qarşı beynəlxalq təzyiqlərə yol açan bu cür siyasi motivli həbslərə son qoymağı tələb edib.

İdarə Heyəti "Azal” hava yolları şirkətinin təyyarə biletlərinin satışının yalnız xarici valyuta ilə həyata keçirməsi haqqında çıxardığı qərarı qətiyyətlə pisləyib.Bufaktın ticari əməliyyatların milli valyuta ilə həyata keçirilməsi barədə konstitusiyada əksini tapan müddəalara zidd olduğunu bildirib və şirkət rəhbərliyini bu cür qeyri-qanuni əməllərə son qoymağa çağırıb.

İdarə Heyəti qanlı 20 Yanvar hadisəsinin növbəti ildönümü ilə bağlı məsələyə münasibət bildirib.İdarə Heyəti bu hadisəni Azərbaycan xalqının milli azadlıq hərəkatının şanlı səhifəsi, rus imperialist qüvvələrinin xalqımıza qarşı törətdiyi beynəlxalq cinayət əməli kimi dəyərləndirib.