Bu gün Böyük Quruluş Partiyasının (BQP) V qurultayı keçirilib.

Qurultay iştirakçıları öncə Şəhidlər Xiyabanını və Türk Şəhidliyini ziyarət ediblər.

Daha sonra Bütöv Azərbaycan Xalq Cəbhəsi Partiyasının qərargahında işə başlayan toplantını BQP Ali Məclisinin sədri Əjdər Əliyev açıq elan edib.

Azərbaycanın müstəqilliyi və ərazi bütövlüyü uğrunda canından keçən şəhidlərin, eləcə də sonuncu qurultaydan sonra dünyasını dəyişən partiya üzvlərinin xatirəsi bir dəqiqəlik sükutla yad olunub.

Daha sonra partiyanın Siyəzən və Qəbələ rayon təşkilatları qeydiyyata alınıb, Qurultaya Hazırlıq üzrə Təşkilat Komitəsinin, BQP başqanı Fazil Mustafanın, Ali Məclisin və Ali Nəzarət Qurulunun sədrlərinin hesabatları dinlənilib.

Cari məsələlərin müzakirəsindən sonra partiya başqanı vəzifəsinə seçkilər keçirilib. Fazil Mustafa yekdilliklə yenidən 4 il müddətinə BQP başqanı seçilib.

Sonda qurultay adından Dağlıq Qarabağdakı mövcud vəziyyətə və Almaniya Bundestaqının "erməni soyqırımı" ilə bağlı qərarına dair qətnamələr qəbul olunub. Bununla da qurultay işini başa çatdırıb.