Əgər ABŞ Qrenlandiyanı zor tətbiq etməklə ələ keçirərsə, bu, Şimali Atlantika Müqaviləsi Təşkilatının (NATO) sonu demək olacaq.

Reyting.az xəbər verir ki, bu fikirləri Avropa Birliyinin Müdafiə və Kosmik Komissarı Andrius Kubilius İsveçdə keçirilən təhlükəsizlik konfransında səsləndirib.

Kubilius bildirib ki, bu məsələdə Danimarkanın baş naziri ilə eyni mövqedədir:

“Qrenlandiyanın zorla ələ keçirilməsi NATO-nun sonu olar və eyni zamanda ictimaiyyət tərəfindən son dərəcə mənfi qarşılanar”.

Avropa Komissarının fikrincə, güc tətbiqi insanlara və transatlantik münasibətlərə çox ciddi mənfi təsir göstərəcək. O, ABŞ-nın Qrenlandiyanı hərbi yolla işğal edəcəyinə inanmadığını desə də, əlavə edib ki, Avropa Birliyi Müqaviləsinin 42.7-ci maddəsi üzv dövlətləri Danimarka hərbi təcavüzlə üzləşərsə, ona yardım göstərməyə məcbur edir.

“Bu, Danimarkanın mövqeyindən və reaksiyasından asılı olacaq, lakin şübhəsiz ki, üzv dövlətlərdən biri hərbi təcavüzə məruz qalarsa, digər üzvlərin ona qarşılıqlı yardım göstərmək öhdəliyi var”, - deyə Kubilius vurğulayıb.

Komissar həmçinin Qrenlandiyanın işğalı ehtimalını şübhə altına alaraq bildirib ki, belə bir addım Avropa ilə ABŞ arasındakı münasibətlərin bütün aspektlərinə ciddi təsir göstərə bilər.

Kubilius sonda sual verib:

“Belə bu işğalın nəticəsini kim tanıyacaq? Bu addım ticarət sahəsi də daxil olmaqla, ABŞ ilə Avropa arasındakı bütün münasibətlərə necə təsir göstərəcək? Üstəlik, amerikalıların özlərinin də olduqca ağır mənfi nəticələrlə üzləşməsi mümkündür”.

E. KAMAL