ABŞ prezidenti Donald Tramp bildirib ki, potensial sülh sazişinə mane olan tərəf Rusiya deyil, Ukraynadır.

Reyting.az xəbər verir ki, Donald Tramp “Reuters” agentliyinə müsahibəsində Rusiya prezidenti Vladimir Putinin müharibəni bitirməyə hazır olduğunu iddia edib.

“Düşünürəm ki, o, razılaşmaya hazırdır”, - Tramp Putin barədə deyib. “Hesab edirəm ki, Ukrayna razılaşmaya daha az hazırdır”.

ABŞ-ın liderliyi ilə aparılan danışıqların İkinci Dünya Müharibəsindən sonra Avropada baş verən ən böyük quru münaqişəsinə niyə son qoya bilmədiyi soruşulduqda, Tramp qısa şəkildə “Zelenski” cavabını verib.

ABŞ lideri əlavə edib ki, Ukrayna prezidenti Vladimir Zelenskini bu razılaşmanı dəstəkləməyin vacibliyinə inandırmaq lazımdır.

Ukrayna prezidentinin danışıqlarda niyə gecikdiyini düşündüyü ilə bağlı suala Tramp ətraflı cavab verməyərək, yalnız “Sadəcə düşünürəm ki, o, istədiyini etməkdə çətinlik çəkir”, - deyə bildirib.

Tramp həmçinin qeyd edib ki, Uitkoff və Kuşnerin Moskvaya potensial səfərindən xəbərsizdir. Xatırladaq ki, “Bloomberg” belə bir səfərin gözlənildiyini yazmışdı.

Gələn həftə İsveçrənin Davos şəhərində keçiriləcək Dünya İqtisadi Forumunda Zelenski ilə görüşüb-görüşməyəcəyi soruşulduqda, Tramp müsbət cavab versə də, hələlik konkret planın olmadığını vurğulayıb.

“Əgər o, orada olsaydı, görüşərdim. Mən orada olacağam”, - deyə Tramp bildirib.

E. KAMAL