Müasir Müsavat Partiyasının sədri Hafiz Hacıyev Ümid Partiyasının sədri İqbal Ağazadənin ünvanına sərt ittihamlar səsləndirib.

Reyting.az-ın məlumatına görə, H.Hacıyev Tərəfdar.az-a açıqlamasında İ.Ağazadənin yenidən deputat olmaq istəyini böyük tikinti biznesini qorumaq cəhdi ilə əlaqələndirib. H.Hacıyev deyib ki, İ.Ağazadə keçmiş MTN rəhbəri E.Mahmudovun himayəsi altında tikinti biznesi iə məşğul olub:

"O, Eldar Mahmudovun köməyilə dənizin kənarında – "Ağ şəhər” tərəfdə binalar tikidirib satırdı. O binalardan böyük paralar qazanırdılar. İndi biznesini itirməkdən qorxur. Düşünürəm ki, qısa müddətdə millətdə saflaşma getməlidir. Hakimiyyətə və parlamentə içində milli qüruru olanlar gəlməlidir. Nə qədər ki, kəşfiyyat orqanları ilə əlaqədə olan siyasətçilər ortada olacaq, Azərbaycan heç zaman düzəlməyəcək”.

H.Hacıyev onu da əlavə edib ki, indiki siyasilərimizin bir çoxu E.Mahmudova bağlı adamlardır: "Həmin siyasiləri MTN-ə calayan Ağazadə olub. Hazırda MM-də Ağazadənin yolunu gedən bir deputat da var. Amma hələlik adını çəkməyəcəm, zamanı gələndə deyəcəm. O da siyasiləri aparıb hakmiyyətin müəyyən qanadlarına "satır”. Belə işlərlə məşğul olurlar. Bütün bu işlərin başında duran isə Ağazadədir. Mən Ağazadənin özünə də demişəm ki, sənin mövqeyin yanlışdır, milli maraqlarımıza ziddir. Sən satqın adamsan”.

MMP sədri iddia edir ki, İqbal Ağazadə pul qazanmaq üçün hər şeyə gedər: "Zanman-zaman gedib də. Düşünürəm ki, Ağazadəyə önəm verməyə dəyməz. Mahmudov da gedib, adamlarının da bir hissəsi gedib. Bir hissəsi isə dirəniş göstərib, qalıb. Hesab edirəm ki, Ağazadə bundan sonra tarixin arxivinə gedəcək”.

Səslənən ittihamlara İ.Ağazadənin cavabı isə çox qısa olub: "Mən qeyri-ciddi məsələlərə münasibət bildirmirəm”.