"Düşünürəm mövcud dəyişikliklər daha çox xarici faktorlardan qaynaqlanır. Dünyada vəregionda baş verən olaylar ciddi narahatlıq doğurur, Azərbaycanı Ermənistanla danışıqlar uğursuzluğa səbəb olarsa, qanlı savaş gözləyir. Görünür, iqtidar bu çağırışlara hazır olmaq və ölkədə davamlı sabitliyin təmin olunmasını prezidentlik institutunun gücləndirilməsində görür".

Reyting.az xəbər verir ki, Azərbaycan Konstitusiyasına dəyişikliklərlə bağlı təklifləri Bütöv Azərbaycan Xalq Cəbhəsi Partiyasının mətbuat xidmətinə şərh edən sədr, millət vəkili Qüdrət Həsənquliyev deyib.

Q.Həsənquliyev daha bir dəyişiklik də təklif edib:

"Türkiyədə yaşananlar göstərdi ki, hərbi qiyam zamanı Prezidentin Milli Məclisin razılığı olmadan Silahlı Qüvvələrdən istifadə hüququ olmalıdır. Çünki həmin vaxt parlamentin iclasını çağırmaq mümkün olmaya bilər. Ona görə də dəyişiklik edilərkən 95.16 və 109.28-cu maddələr Konstitusiyadan çıxarılmalıdır".

Deputat qeyd edib ki, layihəyə əlavə təkliflərini də yaxın vaxtlarda açıqlayacaq: "Biz BAXCP olaraq ölkədə parlamentli respublika tərəfdarı olsaq da, mövcud dəyişikliklərin Konstitusiyanı mürtəceləşdirəcəyi fikirlərini qəbul etmirik".