Moskvada Rusiya və Azərbaycan xarici işlər nazirləri Sergey Lavrov və Elmar Məmmədyarov görüşüblər.

Rusiya XİN başçısı Sergey Lavrov iki ölkə arasında münasibətlərin strateji tərəfdaşlıq səviyyəsində olduğunu deyib. Nazir bildirib ki, Rusiya və Azərbaycan arasında əlaqələr bütün sahələrdə inkişaf edir.

Elmar Məmmədyarov da iki ölkə arasında münasibətlərin yüksək səviyyədə bildirib.

Nazirlər görüşdən sonra birgə mətbuat konfransı da keçiriblər.

Mətbuat konfransında Sergey Lavrov deyib ki, Rusiya müxtəlif formatlar çərçivəsində Dağlıq Qarabağ münaqişəsinin tərəfləri üçün müvafiq həll yolları tapılmasına yardım edəcək. 

"Biz Dağlıq Qarabağ münaqişəsinin nizamlanması barədə danışdıq. Rusiya həm Bakı və İrəvanla ikitərəfli əlaqələr çərçivəsində, həm də Rusiya, Azərbaycan və Ermənistan üçtərəfli görüşləri formatında tərəflər üçün məqbul həll yolları tapmaq məsələsində kömək göstərməyə davam edəcək",-deyə Lavrov bildirib.

Onun sözlərinə görə, Rusiya ATƏT-in Minsk qrupunun digər həmsədrlərinin - ABŞ və Fransanın da iştirakı ilə ərsəyə gələn prinsipial yanaşmalar üzrə mümkün bütün addımları atır.

Rusiya XİN başçısı qeyd edib ki, prezidentlərimizin tapşırıqlarının yerinə yetirilməsi üzərində işləri davam etdirəcəyik.

Elmar Məmmədyarov isə deyib ki, Dağlıq Qarabağ münaqişəsinin həllində tərəqqi lazımdır.

Azərbaycan XİN başçısı rusiyalı həmkarının danışıqların substantiv olmasının zəruriliyi ilə bağlı fikirləri ilə razılaşıb: "Əsaslı danışıqlar qoşunların təmas xəttindəki gərginlik nəticəsində həlak olan hərbçilərin həyatını xilas edə bilər”.

E.Məmmədyarov Ermənistan qoşunlarının Azərbaycanın işğal olunmuş ərazilərindən çıxarılmasının mütləq olduğunu da xatırladıb.

Eyni zamanda Azərbaycan XİN başçısı qeyd edib ki, Ermənistan tərəfinin ritorikası sülhə doğru etdiyimiz hərəkətə uyğun gəlmir.