Azərbaycan Kommunist Partiyasının Mərkəzi Komitəsinin (KP MK) Bürosu bəyanat yayıb.

Azərbaycan KP MK-nın birinci katibi Telman Nurullayev tərəfindən təqdim edilən bəyanatda deyilir ki, son zamanlar, xüsusən də manatın iki dəfə devolvasiyasından sonra respublika əhalisinin sosial vəziyyəti xeyli dərəcədə pisləşib:

"Belə vəziyyətdən ən çox ziyan çəkən əlillər olmuşlar. Məhz bu səbəbdən 06.06.2017-ci il tarixində bir qrup əlil olan şəxslər AR Əmək və Əhalinin Sosial Müdafiəsi Nazirliyi qarşısında etiraz aksiyası keçirmışlər. Buna səbəb isə əlillərin aldıqları müavinatların çox aşağı olmasıdır. Ona görə də partiya xüsusi bəyanatla çıxış edib".

Azərbaycan Kommunist Partiyası Mərkəzi Komitəsinin Bürosu bildirir ki, respublikamızın malik olduğu təbii sərvətlərindən əldə edilən gəlirlər hesabına nəinki əlillərin, o cümlədən respublika təqaüdçilərinin və az təminatlı əhalinin aldıqları təqaüd və müavinatlarının artrılması mümkündür:

"Eyni zamanda Azərbaycan KP MK Bürosu qeyd edir ki, azyaşlı uşaqlar üçün respublikamıza gətirilən məhsullar və pal-paltarlar çox baha qiymətlə alıcılara təqdim edilir. Bu isə az təminatlı ailələr üçün problemlər yaradır.

Azərbaycan KP MK Bürosu əlillərin haqlı tələblərini dəstəkləməklə az yaşlı uşaqlar üçün gətirilən və istehsal olunan məhsullar dövlət himayəsinə götürülməsini və təqaüdçülərin, az təminatlı ailələrin sosial vəziyyətlərinin yaxşılaşdrılması istiqamətində tədbirlər görülməsini respublika hökumətindən tələb edir!".