"Bu gün Azərbaycan dünya siyasətində aktiv siyasi oyunçulardan biri kimi qəbul edilir. Təsadüfi deyil ki, dünyanın aparıcı dövlətlərində keçirilən və az sayda tələb edilən iştirakçılar siyahısında artıq Azərbaycanın da adı tez-tez çəkilməyə başlayıb. Azərbaycan nüvə dövləti deyil. Amma nüvə texnologiyalarının yaradılması haqqında Konvensiya imzalayan, nüvə texnologiyalarını öz potensialı çərçivəsində istifadə etməyi planlaşdırılan ölkələrdən biridir”.

Reyting.az xəbər verir ki, bu sözləri SİA-ya Yeni Azərbaycan Partiyasının Siyasi Təhlil və Proqnozlaşdırma şöbəsinin müdiri, millət vəkili Aydın Mirzəzadə Azərbaycan Prezidenti İlham Əliyevin Vaşinqtonda keçiriləcək IV Nüvə Təhlükəsizliyi Sammitindəki iştirakına münasibət bildirərkən deyib.

Onun sözlərinə görə, bu gün həmçinin Azərbaycan beynəlxalq aləmdə təhlükəsizliyin, ilk növbədə nüvə təhlükəsizliyinin qurulmasına çalışan ölkələrdən biri hesab edilir: "Ölkəmizin regionun lider dövləti olması, Azərbaycanın beynəlxalq aləmdə gedən proseslərin fəal iştirakçısı olması, onun bir çox məsələlərə mövqeyinin öyrənilməsi vacib hesab edilir.

Birincisi, Azərbaycanın Vaşinqtonda keçiriləcək IV Nüvə Təhlükəsizliyi Sammitində iştirakı ölkəmizin ildən-ildən artan nüfuzunun artıq qiymətidir.

İkincisi, Azərbaycanın bu sammitdə iştirakı nüvə təhlükəsizliyi sahəsində əməkdaşlıq sisteminin vacib bir hissəsinə çevrilməsinə gətirib çıxardır.

Üçüncüsü isə, nüfuzlu dövlətlər nə qədər çox bir-biri ilə təmasda olarlarsa, dünyada stabilliyi bir o qədər çox qoruyub saxlamaq olar. Hesab edirəm ki, dünya bu gün Azərbaycansız təhlükəsizliyin olmadığı qənaətindədir”.