"Ölkə başçısının martın 17-də imzaladığı əfv sərəncamı bir daha sübut etdi ki, ölkədəki istənilən məsələni dialoq yolu ilə həll etmək olar".

Reyting.az-ın məlumatına görə, millət vəkili Azay Quliyev parlamentin plenar iclasında Azərbaycan prezidentinin martın 17-də imzaladığı əfv sərəncamı haqqında mövqeyini açıqlayarkən deyib (Moderator.az).

Azay Quliyevin sözlərinə görə, imzalanan əfv sərəncamının humanizmliklə yanaşı digər mühüm nəticələri də var: "İlk olaraq bu əfv sərəncamı göstərdi ki, ölkədə fəaliyyət göstərən hüquq müdafiə təşkilatlarının ölkə başçısına təqdim etdiyi insanlar əfv olunub. Bu, bir daha göstərir ki, bütün məsələləri dialoq və danışıqlarla həll etmək olar.

Bundan əlavə, ölkədə insan haqları ilə bağlı İşçi Qrup fəaliyyət göstərir və bu qurumun fəaliyyətinə böyük etimad yaranıb. Baxmayaraq ki, AŞPA baş katibinin bu qurumun fəaliyyətinə mövqeyi yanlış idi”.

A.Quliyev deyib ki, növbəti bir məqam da ondan ibarətdir ki, ölkədə hər hansı məsələ ilə bağlı ölkə başçısına müraciət etmək lazımdır, nəinki xaricdən maliyyələşən və ya beynəlxalq təşkilatlara: "Beynəlxalq təşkilatlardan yardım istəməklə Azərbaycana təzyiq etmək mənasızdır. Bu gün hər hansı məsələninin həllində Azərbaycanla təzyiq və ya ultimatum dili ilə danışmaq olmaz”.

A.Quliyev onu da əlavə edib ki, ölkə başçısının bu sərənmcamı beynəlxalq aləm tərəfindən çox yüksək qiymətləndirilib: "Artıq AŞPA, ATƏT PA, Avropa İttifaqı, ABŞ Dövlət Departamenti AzərbaycanPrezidentinin bu əfv sərəncamını alqışlayaraq, yüksək dəyərləndiriblər. Azərbaycan Prezidentinin bu sərəncamına beynəlxalq aləmdə böyük etimad göstərildi”.