Professor: “Azərbaycan-Ermənistan danışıqlarının gündəliyində Qarabağ məsələsi yoxdur”
Tarix: 30-09-2022 09:15 | Bölmə: Slayd
Professor: “Azərbaycan-Ermənistan danışıqlarının gündəliyində Qarabağ məsələsi yoxdur”

“Azərbaycan və Ermənistan arasında bir neçə istiqamətdə danışıqlar aparılır. İndiyə qədər Azərbaycan prezidenti ilə Ermənistan baş naziri dörd dəfə görüşüb. Eləcə də xarici işlər nazirləri arasında görüşlər keçirilir. Nəhayət Azərbaycan prezidentinin köməkçisi Hikmət Hacıyevlə Ermənistan Təhlükəsizlik Şurasının katibi Qriqoryan da müzakirələr aparıblar. Bundan başqa, hər iki ölkənin baş nazirlərinin müavinləri arasında əlaqələr olub. Dövlət Təhlükəsizliyi Xidməti də danışıqlar aparır və bu, Ermənistandakı bəzi qüvvələri ciddi şəkildə narahat edir. Onlar bu danışıqlarda nələrin müzakirə edilməsi ilə maraqlanırlar”.

Bunu Reyting.az-a professor Cümşüd Nuriyev Ermənistan Təhlükəsizlik Şurasının katibi Armen Qriqoryanın danışıqlarla bağlı açıqlamasını şərh edərkən deyib.

C. Nuriyevin sözlərinə görə, A. Qriqoryan danışıqları ümumiləşdirərək delimitasiya-demorkasiya, yolların blokadadan çıxarılması, habelə sülh danışıqlarının əsas gündəm olduğunu bildirib: “O, eyni zamanda Qarabağ məsələsinin də gündəmdə olduğunu iddia edib. Amma bu, əsassızdır. Azərbaycan çoxdandır ki, Qarabağ məsələsini Ermənistanla müzakirə etmir”.

C. Nuriyevin fikrincə, əsasən sərhədlərin delimitasiya və demorkasiya məsələsi, regionda logistika xətlərinin açılması, sülh sazişi istiqamətində danışıqlar aparılır: “Azərbaycanın danışıqlarının gündəliyində Qarabağ məsələsi yoxdur. Azərbaycan elan edir ki, öz vətəndaşlarımıza yaradılan şərait Qarabağda yaşayan ermənilərə də yaradılacaq”.

Professor əlavə edib ki, hazırda da Bakıda ermənilər yaşayır: “Bizim blokda iki-üç erməni var, məndən də yaxşı yaşayırlar. Hər cür şəraitləri, şəhərin mərkəzində evləri... Biz onların erməni olduqlarını bilirik, amma Azərbaycan vətəndaşı olduqları üçün heç kəsin onlarla işi yoxdur. Amma Ermənistanın paytaxtı İrəvanda bir azərbaycanlı ailəsini bizə göstərə bilməzlər. Yoxdur. Çünki ermənilər 30 ildir etnik separatçılıqla məşğuldur, bu dövlətin ərazisində bir azərbaycanlının yaşamasına belə imkan verməzlər”.

C. Nuriyev qeyd edib ki, bu baxımdan, Qriqoryan Qarabağ məsələsinin danışıqların gündəliyində olmasına dair fikirləri erməni cəmiyyəti üçün nəzərdə tutaraq deyib: “Ondan əvvəl Paşinyan da sərsəm açıqlama verərək Azərbaycanı Qarabağdakı ermənilərlə birbaşa danışıqlara çağırıb. Heç bunu Azərbaycanın zəif vaxtlarında Heydər Əliyev qəbul etməmişdi, o ki qala indiki güclü vaxtımızda İlham Əliyev qəbul edə. Əlbəttə, bu, hiyləgər erməni siyasətidir, Paşinyanı kimsə öyrədir, məsləhət verir. Burada münaqişə tərəfi birbaşa Ermənistandır və danışıqlar da onunla aparılır”.

Onu da qeyd edək ki, Rusiya Baş nazirinin müavini, Cənubi Qafqazda iqtisadi və nəqliyyat əlaqələrinin açılması ilə bağlı Üçtərəfli İşçi Qrupun Rusiyadan olan həmsədri Aleksey Overçuk “Rossiyskaya qazeta”ya müsahibəsində bu məsələlərdən danışıb.

Overçuk diqqətə çatdırıb ki, nəqliyyat əlaqələrinin açılması bütün tərəflər üçün birmənalı olaraq müsbətdir:

“Azərbaycan vətəndaşları Ermənistan ərazisindən keçməklə Naxçıvana və geriyə hərəkət imkanı əldə edəcəklər. Ermənistan isə nəhayət, Azərbaycan Respublikası ərazisindən vətəndaşlarının, nəqliyyat vasitələrinin və yüklərinin Rusiyaya, İrana, Orta Asiyaya və geriyə sərbəst hərəkəti imkanı əldə edəcək”.

Overçukun sözlərinə görə, bu qarşılıqlı hərəkət, ticari və humanitar əlaqələrin inkişafı və nəhayət, Cənubi Qafqaz regionunda uzunmüddətli yaraları sağaltmağa başlamağa imkan verəcək.

Reyting.az




Bölməyə aid digər xəbərlər
{sape_links}{sape_article}