Rusiya-Ukrayna müharibəsi başladıqdan sonra qızıl qiymətlərinin artımı Kremlə təxminən 200 milyard dollardan çox gəlir gətirib.

Reyting.az xəbər verir ki, "Bloomberg" analitiklərinin hesablamalarına görə, 2022-ci ilin fevral ayından Rusiya Mərkəzi Bankının qızıl ehtiyatlarının dəyəri 216 milyard dollar artıb.

Müqayisə üçün vurğulanır ki, bu məbləğ Avropa İttifaqı tərəfindən dondurulmuş Rusiyanın suveren aktivlərinə (təxminən 244 milyard dollar) yaxındır.

Qeyd edək ki, ötən ilin sonunadək Rusiyanın beynəlxalq ehtiyatları 755 milyard dollara çatıb. Üstəlik, bu kapital ehtiyatlarının 326,5 milyardı ancaq qızılda saxlanılır. Beləliklə, məlum olub ki, Rusiya dövləti ildə 300 tondan çox qızıl hasilatı ilə dünya ölkələri arasında ikinci ən böyük qızıl istehsalçısına çevrilib.

2022-ci ildən sonra Rusiya Federasiyasının qızılı Qərb bazarlarından kənarlaşdırılsa da, hələ ki, monetizasiya imkanları qalır. Ötən il qızılın qiyməti 65 faiz artıb və 1979-dan bəri ən güclü illik yüksəlişi göstərib.

Analitiklər bildiriblər ki, 2022-2025-ci illər ərzində Rusiyanın qızıl ehtiyatlarının dəyəri demək olar, iki dəfədən də çox artıb, o cümlədən valyuta ehtiyatları təxminən 14 faiz azalıb. Bu göstərici o deməkdir ki, Rusiyada qızılın ehtiyatlardakı payı müharibədən əvvəlki 21 faizdən 43 faizə yüksəlib.

Qeyd olunur ki, Rusiyanın Maliyyə Nazirliyinin bu cür uzunmüddətli perspektivdə uğurlu gözləntiləri var və hazırda bu ölkədə qızılın unsiyasının 5000 dollara çata biləcəyini proqnozlaşdırırlar.

Oqtay QORÇU