Dünyada ən böyük, həmçinin "Saf torpağın ulduzu" adlandırılan 3563 karatlıq bənövşəyi sapfir nümayiş olunub.

Reyting.az-ın məlumatına görə, Şri-Lankada nümayişə çıxarılan daş 2023-cü ildə "qiymətli daşlar şəhəri" kimi tanınan Ratnapura bölgəsində tapılıb.

"Associated Press" nəşri yazır ki, sapfirlə bağlı danışan məsləhətçi-gemmoloq Aşan Amarasinqhenin sözlərinə görə, qeyri-adi olan bu gözəl daş dünyada rəsmi qeydə alınmış ən böyük təbii bənövşəyi sapfirdir.

Daş altı şüalı ulduz effekti, xüsusi asterizmi ilə seçilir.

Sapfir tapıldıqdan dərhal sonra digər daşlarla birlikdə satılıb. Təxminən iki il sonra isə onun çox nadir nümunə olduğu müəyyən edilib və iki böyük laboratoriyada sertifikatlaşdırılıb.

Sahibləri sapfiri yenidən satışa çıxarmağa hazırdır. Beynəlxalq qiymətləndiricilər onun dəyərinin təxminən 300-400 milyon dollar arasında olduğunu bildiriblər.

Oqtay QORÇU