İnklüziv studiyası ilk məşqlərinə başlayıb - Fotolar
Tarix: 28-04-2021 23:59 | Bölmə: Mədəniyyət
İnklüziv studiyası ilk məşqlərinə başlayıb

Azərbaycan Dövlət Akademik Musiqili Teatrında YUNESKO tərəfindən təsdiq edilən “İnklüziv teatr” layihəsinin üzvləri ilə məşqlərə start verib. Eşitmə və danışma məhdudiyyətli uşaq və gənclərin iştirakı ilə keçirilən bu layihənin məşqlərinə simvolik olaraq işarət dili ilə səssiz alqışlarla başlanılıb.

Tetrdan Reyting.az-a verilən məlumata görə, layihənin rəhbəri, Azərbaycan Dövlət Akademik Musiqili Teatrının direktoru Əliqismət Lalayev "İnklüziv teatr” barəsində toplaşanlara bir daha ətraflı məlumat verib, layihənin keçirilməsində əməyi olan hər kəsə təşəkkürlərini bildirib.

Teatrın yaradıcılıq studiyasının bədii rəhbəri, görkəmli teatr və kino aktrisası, Xalq artisti Şəfiqə xanım Məmmədova bu studiyanın tərkibində fəaliyyət göstərəcək qrupun iştirakçılarına uğurlar arzulayıb, öz tövsiyələrini verib. Teatr səhnəsinin onun üçün xüsusi əhəmiyyət kəsb etdiyini və müqəddəs olduğunu vurğulayan Şəfiqə xanım karifey sənətkarların ruhlarına ehtiram olaraq, hamını işlərinə məsuliyyətlə yanaşmağa çağırıb.

Mədəniyyət Nazirliyinin İncəsənət şöbəsinin müdiri Fərəh xanım Acalova və nazirliyin Beynəlxalq əməkdaşlıq və innovativ inkişaf şöbəsinin məsləhətçisi Araz Bağırlı layihə haqqında fikirlərini bildiriblər. Onlar çıxışlarında nazirlik tərəfindən hər zaman belə layihələrin dəstəkləndiyini xüsusilə vurğulayıblar. Azərbaycanda eşitmə və danışma məhdudiyyətli insanların teatrının yaradılması ilə ilkə imza atan Akademik Musiqili Teatrın rəhbərliyinə belə bir humanist addım üçün təşəkkürlərini bildiriblər.

Qeyd edək ki, layihənin baş prodüseri, teatrın beynəlxalq layihələr üzrə koordinatoru Rəcəb Məmmədovdur.

Fiziki məhdudiyyətli bu şəxslərin səhnəyə hazırlanmasında tanınmış aktyor Pərviz Məmmədrzayev, rejissor Əsgər Əsgərov çalışacaqlar.

Layihədə işarət dilindən xüsusi təlim almış Akademik Musiqili Teatrın könüllüləri də iştirak edəcəklər. Teatrın əməkdaşı Aludə Şəkərovanın rəhbərliyi ilə könüllü gənclər layihə boyunca “İnklüziv teatr” üzvlərinin teatra daha doğma tellərlə bağlı olmalarına kömək edəcəklər.

Teatrın “Yaradıcılıq studiyası”nın tərkibində fəaliyyətə başlayan “İnklüziv teatr” layihəsinin kollektivi ilə görüşlər və təlimlər əsasən onlayn şəkildə və həftənin 2 günü isə teatrda, çox kiçik heyətdə, pandemiyanın tələb etdiyi qaydalara ciddi əməl olunmaqla aparılacaqdır.








Bölməyə aid digər xəbərlər
bütün xəbərlər
{sape_links}{sape_article}