17:38 / 28-03-2024
Əməkdar artist vəfat edib
Dövlət başçısından müharibəyə başlamaq tələb olundu - Müraciət
Tarix: 10-03-2020 17:45 | Bölmə: Siyasət
Dövlət başçısından müharibəyə başlamaq tələb olundu

Torpaqlarımızın işğal altında qalması, şəhidlərimizin sayının artması və digər məsələlərdən narahatıq. Bu səbəbdən də Azərbaycan Respublikasının Prezidenti, Ali Baş Komandan İlham Əliyevə müharibəyə başlamaq tələbi ilə müraciət edirik.

Reyting.az
xəbər verir ki, belə bir tələbi Qarabağ Azadlıq Təşkilatı, “Qarabağ Əlillərinə Qayğı” İctimai Birliyi, “Məcburi Köçkünlərin Sosial Hüquqlarının Müdafiəsi” İctimai Birliyi və “Jurnalistlər Ekstremal Şəraitdə” İctimai Birliyi irəli sürüb.

Reyting.az-a göndərilən birgə müraciətdə deyilir ki, torpaqlarımızın 30 ilə yaxındır işğal altında qalmasına artıq dözmək olmur:

“Həddindən artıq çox vaxt keçib, hələ də münaqişənin həlli ilə bağlı heç bir nəticə yoxdur. Beynəlxalq təşkilatların ədalətsiz mövqeyi danışıqların nəticəsiz qalmasına səbəb olub. İşğalçı Ermənistan zəbt etdiyi ərazilərimizdə ağalıq edir, torpaqlarımızdan çıxmayacağı ilə bağlı həyasız bəyənatlar verir, qeyri-qanuni məskunlaşma həyata keçirir. Reallıq ondan ibarətdir ki, beynəlxalq təşkilatlar münaqişənin ədalətli həlli üçün təsirli addım atmaq, tədbir görmək istəmir, işğalçı Ermənistan isə ilhaqçı iddialarından çəkilmir”.

Müraciətdə qeyd olunur ki, cəbhə bölgəsində itkilərimizin sayı artır, şəhidlər veririk: “Son günlərdə daha iki əsgərimizin şəhid olması cəmiyyətin hiddət və qəzəbini bir az da artırdı. Biz də, cəmiyyət də bu vəziyyətə son qoyulmasını tələb edirik, Sizdən təcili və təsirli tədbirlər gözləyirik. Azərbaycan cəmiyyəti torpaqlarımızın azadlığı naminə savaşa hazırdır, hər yerdə düşmənə qarşı intiqam, qisas, nifrət hissi hökm sürür. Siz artıq seçim etməlisiniz, hər kəsin gözü Sizdədir, Sizin qərarınızı - müharibə əmrini gözləyirik”.

Prezidentə müraciətdə daha sonra yazılır:

“Hər kəs sual, təlaş, həyəcan içərisindədir: nə üçün müharibə əmri verilmir? Nədən, kimdən çəkinirik? Xalqın iradəsi, fədakarlığı qarşısında heç bir qüvvə - nə işğalçı Ermənistan, nə də onun arxasındakılar dayana bilər. Biz ölməyə və öldürməyə hazırıq. Bütün xalq bu əhval-ruhiyyədədir. Biz Sizin arxanızdayıq, müharibə ilə bağlı istənilən qərarınızı dəstəkləməyə hazırıq”.

Dövlət başçısına müraciət bu cümlələrlə yekunlaşır:

“Biz təşkilat olaraq, Qarabağ həsrəti ilə yanan sadə vətəndaş olaraq, düşmənə nifrət, intiqam, qisas hissi ilə yaşayan, döyüşə, ölməyə, öldürməyə hazır olan, torpaqlarımızın işğalına dözə bilməyən, ürəyi parça-parça olan, bu rəzil durumda yaşamaq istəməyən Vətən övladları Sizdən tələb edirik, düşmənə qarşı müharibə əmrini verin! Hər kəs bilməlidir: Qarabağsız Azərbaycan olmayacaq! Ya Qarabağ, ya ölüm!”




Bölməyə aid digər xəbərlər
17-03-2024, 12:16 “Kompas” səmtini azıb

{sape_links}{sape_article}