17:38 / 28-03-2024
Əməkdar artist vəfat edib
Deputat koronavirusla mübarizəyə dəstək çağırışı etdi
Tarix: 22-03-2020 12:49 | Bölmə: Siyasət
Deputat koronavirusla mübarizəyə dəstək çağırışı etdi

“Zəruri ehtiyaclar üçün tələb olunan ailə büdcəsinə ziyan vurmadan, eləcə də az və ya çox olmasından asılı olmayaraq, hər kəs Koronavirusla Mübarizəyə Dəstək Fonduna dəstək verməlidir”.

Reyting.az
xəbər verir ki, bunu Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev "Xalq cəbhəsi' qəzetinə müsahibəsində deyib.

Q. Həsənquliyev qeyd edib ki, Azərbaycan Respublikası Prezidentinin 1 illik əməkhaqqını həmin Fondun hesabına köçürməsi, Heydər Əliyev Fondunun, “Paşa Holdinq”in, "Neqsol"un, "Gilan"ın, "Azərcell"in, "Accord" və digər şirkətlərin koronavirusla mübarizəyə verdikləri dəstək qürurvericidir.

Q. Həsənquliyev deputat həmkarlarının da bu işə verdiyi hərtərəfli dəstəyi xüsusi qeyd edib. Onun sözlərinə görə, xalqımız çətin vəziyyətdə birlikdə olmaq qabiliyyətini bir daha nümayiş etdirdi.

Jurnailstin “Axı, bəziləri birlik üçün uzadılan əlləri sıxmadılar...”, - sualına Q. Həsənquliyev “Əgər “5-ci kolon” adlandırılan "Milli Şura"nı nəzərdə tutursunuzsa, bütün xalqların içərisində belələri olur. Onlar müstəqilliklərini çoxdan satıblar. Belə çətin dövrdə Prezident onları dialoqa dəvət etdi, amma müxtəlif bəhanələrlə bundan yayındılar.

Hökuməti internet üzərindən koronavirusla effektiv mübarizə aparmamaqda ittiham edirlər. Əgər düz adamsansa, cəmiyyətdə qorxu hissini gücləndirmək əvəzinə, get görüş, təkliflərini ver. İnşallah, böhran keçər və sonra deyərsən ki, mən filan təklifləri təqdim etmişdim. Yox, əgər görsən ki, zəruri addımlar atılmır, o zaman mətbuata danış”, - cavabını verib.

BAXCP sədri diqqətə çatdırıb ki, Prezidentin dialoq üçün səlahiyyət verdiyi Prezident Administrasiyasının şöbə müdiri Ədalət Vəliyev heç bir görüşdə heç kimə vaxt məhdudiyyəti qoymayıb: “Ədalət Vəliyev kiməsə deməyib ki, filan mövzuya toxunma. Yox, qorxursansa ki, cəfəng ideyalarına yerindəcə verilən cavaba görə pis vəziyyətə düşə bilərsən, bu, başqa məsələ...”.

Q. Həsənquliyevin sözlərinə görə, Prezidentin bir ilk olaraq parlament rəhbərliyində digər partiyaların təmsilçiliyinin təmin edilməsi istiqamətində sərgilədiyi mövqe, Novruz bayramı münasibətilə cəmiyyətin aparıcı qüvvəsi olan ictimai-siyasi xadimlərə, siyasi partiyalara ayrıca təbrik göndərməsi ölkədə milli həmrəyliyə yönələn ciddi addımlardır. İnsanlarımız bunu yüksək qiymətləndirir və bu addımlar cəmiyyətimizin kataklizmilərsiz inkişafına öz töhfəsini verəcəkdir.

Azərbaycanın əsas ixrac məhsulu olan neftin qiyməti kəskin aşağı düşüb. Makroiqtisadi sabitliyi qorumaq və sürətli iqtisadi inkişafa nail olmaq üçün hazırkı vəziyyətdə hökumətin atmalı olduğu zəruri addımlardan da söz açan partiya sədri diqqətə çatdırıb ki, BAXCP olaraq uzun illərdir təkidlə hökuməti özəlləşdirmə həyata keçirməyə çağırırıq:

“Böyük miqyasda dövlət əmlakını özəlləşdirmədən Azərbaycanda Qərb dövlətlərində olduğu kimi güclü, rəqabətə davamlı iqtisadiyyat qurmaq mümkün olmayacaq. 74 illik sosialist təsərrüfat sistemi sübut edib ki, dövlət mülkiyyətində olan müəssisələrdə mənimsəmə yüksək olur və yeni texnologiyaların tətbiqində rəhbərlik o qədər də maraqlı olmur. Mənim seçildiyim Xətai rayonunda, dəniz kənarında 18 hektar ərazidə yerləşmiş, müstəqillik dövründə fəaliyyətini dayandırmış Hacı Zeynalabdin Tağıyev adına böyük toxuculuq kombinatı var. Sovet dönəmində orada 7 minə qədər insan çalışıb. İndi on illərdir qapıları bağlanıb. Bu tipli müəssisələri bərpa etmək, yeni iş yerlərinin açılması və böyük investisiyalar qarşılığında cüzi qiymətlərə özəlləşdirmək lazımdır. Əgər investorun vəsaiti yetmirsə, hətta ona güzəştli şətlərlə uzunmüddətli kreditlər də vermək olar.

Hər il büdcədən pul ayırdığımız iri dövlət şirkətlərinin, açıq və qapalı cəhmdar cəmiyyətlərin bəziləri özəlləşdirilməli, bəziləri isə ciddi investisiya qoyuluşu qarşılığında bu istiqamətdə təcrübəsi olan xarici şirkətlərə uzunmüddətli idarəetməyə verilməlidir.

Olimpiya kompleksləri, səhiyyə və ali təhsil müəssiələrinin əhəmiyyətli hissəsi özəlləşdirilməlidir. Ağır maliyyə yükündən və korrupsiyadan qurtarmağın, büdcə gəlirlərini artırmağın tək yolu budur.

Eyni zamanda, böyük işçi qüvvəsinin çalışdığı tikinti sektorunu canlandırmaq üçün tikintiyə icazə şərtləri xeyli sadələşdirilməlidir. Sahibkarlara yönələn bütün qanunsuz tələblər aradan qaldırılmalı, onlar yalnız satdıqları əmlakdan götürdükləri mənfəətə görə vergi ödəməlidirlər. Yalnız bu halda Azərbaycandan qaçmış tikinti şirkətləri geri dönə bilər”.

Milli Məclis üzvü deyib ki, Azərbaycanda səhmlərin satıldığı normal birja fəaliyyəti təmin olunmalıdır. Eyni zamanada vergi və gömrük rüsumları elə tənzimlənməlidir ki, sahibkarlar malın idxal dəyərini azaltmaqda və vergidən yayınmaqda maraqlı olmasınlar.

“Kölgə iqtisadiyyatının qarşısını almaq üçün nağdsız ödənişlərə keçilməlidir. İri və nüfuzlu xarici bankları ölkəyə cəlb edib rəqabət mühiti yaratmaqla aşağı faizlə kreditlərin verilməsini təmin etməliyik.

Neft Fondundan 2 milyard dollar götürüb yerli banklarda yerləşdirməliyik. Xarici investisiyanın cəlbi üçün əhəmiyyətli vergi güzəştləri nəzərdə tutulmalıdır. Bir sözlə, bazar iqtsadiyyatına tam keçid təmin olunmalı, proteksionizmə son qoyulmalı, güclü məhkəmə hakimiyyəti formalaşdırılmalıdır. Yalnız bu yolla biz rəqabətədavamlı və dayanıqlı iqtisadiyyat qura bilərik”, - Q. Həsənquliyev qeyd edib.

Reyting.az




Bölməyə aid digər xəbərlər
17-03-2024, 12:16 “Kompas” səmtini azıb

{sape_links}{sape_article}