“Azercell” gəlirlərini gizlədir
Tarix: 10-03-2023 16:34 | Bölmə: İqtisadiyyat
“Azercell” gəlirlərini gizlədir

“Azərbaycanın qeyri-neft sektorunun ən böyük vergi ödəyicisi olan “Azercell” ötən ilin yekun hesabatını açıqlayıb. Açıqlamaya, təqdim edilən statistikaya, infrastruktura və texnologiyalara, investisiya xərclərinə diqqət yetirdikdə, “Azercell” dövlət şirkətinə çevriləndən sonra bəlkə də, ilk dəfə olaraq müşahidə etdim ki, vəziyyət müsbətə doğru dəyişib. Amma mobil sektorda ən yüksək bazar payına - 48 faizdən çox paya sahib olan “Azercell” yenə də gəlirlərini açıqlamayıb”.

Bunu Reyting.az-a Azərbaycan İnternet Forumunun prezidenti, Multimedia Mərkəzinin direktoru Osman Gündüz deyib.

Onun sözlərinə görə, hesabatla bağlı açıqlamadan anlaşılmır ki, qurum ötən ili zərərlə başa vurub, yoxsa mənfəət əldə edib.


O. Gündüz

O. Gündüz qeyd edib ki, “Azercell” “dövlətləşəndən” sonra gəlirləri və xərclərini açıqlamaqda xəsislik edir:

“Hansı ki, bu, normalda əksinə olmalıydı, “dövlətləşəndən” sonra cəmiyyətin daha çox marağında olan qurumun hesabatlılığı, şəffaflığı artmalıydı. Əvvəlki hesabatlara nisbətən bu açıqlama daha dolğun olsa da, görülən işlər, layihələr və tədbirlər daha çox gözə çarpsa da, digər bir çox əhəmiyyətli məqamlara da aydınlıq gətirilməyib”.

O. Gündüz deyib ki, açıqlanan geniş məlumatda abonent bazasındakı dəyişiklik (açıqlanan faizdən görünür ki azalma olub), hər mobil istifadəçiyə görə orta gəlirlər, səs danışığından və mobil internetdən əldə olunan gəlirlər, datanın dinamikası, istifadə edilən trafik həcminin 4G/3G/2G arasında bölgüsü, rouminqlə bağlı gəlirlər, xidmətlərlə - məsələn, “Asan imza”dan əldə olunan gəlirlər və s. bu tip ictimai faydalı məlumatlar yoxdur: “Ümid edirəm ki, hesabat tam açıqlananda və sayta yerləşdiriləndə ictimai əhəmiyyət kəsb edən məlumatları görə biləcəyik”.

O. Gündüz xatırladıb ki, 2018-ci ilin martında RİNN yanında “AzInTelecom” MMC Maliyyə Nazirliyinin ayırdığı 450 milyon manat vəsaitlə “Azercell”in səhmlərinin 51.3 faizini satın alıb. Bundan sonra “Azercell” “AzİnTelecom” daxilində olmaqla dövlət şirkətlərinin reyestrinə daxil edilib.

E. KAMAL
Reyting.az





Bölməyə aid digər xəbərlər
{sape_links}{sape_article}