“Atəşkəsin təmin olunmasının yalnız bir yolu var...”
Tarix: 20-10-2020 17:33 | Bölmə: Xəbər lenti
“Atəşkəsin təmin olunmasının yalnız bir yolu var...”

"Ümid edirdik ki, BMT Təhlükəsizlik Şurasının Dağlıq Qarabağla bağlı keçirilən qapalı toplantısında Ermənistan qoşunlarının işğal edilmiş Azərbaycan ərazilərindən çıxmasını özündə ehtiva edən 4 qətnamənin İrəvan tərəfindən qeyd-şərtsiz icra olunması müzakirə ediləcək və Ermənistandan qəti şəkildə həmin qətnamələrə əməl etmək tələb olunacaq. Ancaq Təhlükəsizlik Şurası bunun əksinə olaraq Dağlıq Qarabağda atəşkəsin təmin edilməsinin vacibliyini önə çəkib. Halbuki Dağlıq Qarabağda atəşkəsin təmin olunmasının yalnız bir yolu var ki, o da Ermənistanın işğal etdiyi Azərbaycan ərazilərindən çıxmasıdır".

Reyting.az
xəbər verir ki, bunu Milli Vəhdət Partiyasının sədr müavini Süleyman İsmayılbəyli deyib.

Onun sözlərinə görə, bu gün atəşkəsin təımin olunması çağırışını edən beynəlxalq təşkilatlar, qurumlar, eləcə də BMT Təhlükəsizlik Şurası nədənsə Qarabağda yaranmış vəziyyətin səbəbini öyrənmək, onu aradan qaldırmaq barədə deyil, atəşkəsə nail olub yenidən Ermənistanın silahlanmasına imkan yaratmaq istəyirlər:

"Bütün dünyaya bəllidir ki, atəşkəsin təmin olunmasına əsas maneə Ermənistandır. Məhz son proseslər zamanı da əldə edilmiş humanitar atəşkəsi Ermənistan pozdu. Humanitar atəşkəs razılığı əldə ediləndən bir neçə saat sonra Azərbaycanın ikinci böyük şəhəri olan Gəncəyə raket atdı, onlarla günahsız, mülki insanı qətlə yetirdilər. Ancaq təəssüflər olsun ki, Ermənistan Gəncədə mülki insanları hədəf alarkən bu gün Azərbaycana atəşkəs çağırışı edən beynəlxalq təşkilatlar, dünya dövlətləri səslərini çıxarmadılar".

MVP rəsmisi qeyd edib ki, bu gün dünya ölkələri, beynəlxalq təşkilatların atəşkəs barədə çağırışları da insan taleyini qurtarmaq, insan həyatına yönəlik təhlükəni aradan qaldırmağa deyil, məhv olmaq ərəfəsindəki Ermənistanı xilas etməyə hesablanıb: "Əgər belə olmasaydı 30 il ərzində münaqişənin həlli istiqamətində addım atmağa maraqlı görünərdilər. Onları bu gün düşündürən yalnız Ermənistanı məhv olmaqdan xilas etməkdir. Artıq aydın şəkildə görürlər ki, Azərbaycan Ordusu sürətli əks-hücum əməliyyatları ilə öz torpaqlarını azad edir və hər gün gedən döyüşlərdə yüzlərlə erməni əsgəri Ermənistan hakimiyyətinin mənasız mübarizəsinin qurbanına çevrilir. Proseslərin bu templə gedişi Ermənistanın əhalisiz qalmasına gətirib çıxaracaq. Çünki hər şeydən əli üzülən Paşinyan qoca, qadın, gənc demədən hər kəsi Azərbaycanla müharibəyə cəlb edir. Onlar da döyüş meydanlarında Azərbaycan Ordusunun uğurlu əməliyyatları ilə məhv edilirlər".

S. İsmayılbəyli deyib ki, Qarabağda atəşkəsin təmin olunmasını istəyən beynəlxalq təşkilatlar, güclər zəhmət çəkib Ermənistandan işğal etdiyi ərazilərimizi boşaltmağı tələb etsinlər: "Əgər bu baş vermirsə, o zaman hansı atəşkəsdən, yaxud bu prosesə nəzarət edəcək beynəlxalq müşahidəçilərdən söhbət gedə bilər?. Düşünürəm ki, bu kimi mənasız təşəbbüslərə Azərbaycan Respublikasının Prezidenti cənab İlham Əliyevin TASS Agentliyinə verdiyi müsahibədə söylədiyi fikirlər ən yaxşı cavabdır. Dövlət başçısı həmin müsahibə zamanı haqlı olaraq bildirib: "Hərbi müşahidəçilər texniki baxımdan necə və harada yerləşdirilə bilər? Axı döyüş meydanında vəziyyət hər gün dəyişir. Hansısa xarici müşahidəçilər oraya gələndə harada dayanacaqlar? Haradasa dağlarda, vadilərdə, körpülərin üstündə? Yəni, bütün bunlar çox ətraflı işlənib hazırlanma tələb edir. Bu, öz hərbi kontingentini oraya göndərməyi lazım bilənlər üçün böyük riskdir".




Bölməyə aid digər xəbərlər
25-11-2020, 20:39 Maradona vəfat edib

bütün xəbərlər
bütün xəbərlər
{sape_links}{sape_article}