Azərbaycanın dünya incəsənətinə bəxş etdiyi nəhəng simalardan biri - bəstəkar, professor Qara Qarayevin anadan olmasının 108-ci ildönümü qeyd olunub. Bu münasibətlə dahi bəstəkarın Bakıdakı ev-muzeyində tədbir keçirilib.

Azərbaycan Dövlət Musiqi Mədəniyyəti Muzeyinin direktoru, sənətşünaslıq doktoru, Əməkdar mədəniyyət işçisi Alla Bayramova SSRİ xalq artisti, Sosialist Əməyi Qəhrəmanı, Lenin mükafatı laureatı, SSRİ Bəstəkarlar İttifaqının katibi, Azərbaycan Dövlət Konservatoriyasının rektoru, professor Qara Qarayevin zəngin yaradıcılığından, mürəkkəb dövrləri əhatə edən ömür yolundan danışıb. Müstəqillik dövründən sonra Azərbaycan dövlətinin dahi bəstəkarın musiqi irsinə göstərdiyi diqqət və qayğıdan bəhs edib.

Qara Qarayevin ev-muzeyinin elmi işçisi Lətifə Məmmədova fəaliyyətə başladığı səkkiz il ərzində burada keçirilən tədbirlərdən söhbət açıb, görkəmli musiqi xadiminin xatirəsi qorunan bu məkanın Bakının mədəni həyatındakı rolunu yüksək qiymətləndirib.

Tədbirdə Qara Qarayevdən bəhs edən video-çarx nümayiş etdirilib. Bakı Musiqi Akademiyasının, İncəsənət Gimnaziyasının və Bülbül adına Orta İxtisas Musiqi Məktəbinin tələbələrinin ifasında dahi bəstəkarın əsərləri ifa olunub.

E.CƏBRAYILOĞLU

Reyting.az