17:38 / 28-03-2024
Əməkdar artist vəfat edib
Partiya sədri: “Belə çıxır ki, ABŞ Minsk qrupunun dirçəldilməsi üçün Azərbaycana təzyiq göstərə bilər”
Tarix: 22-06-2022 15:26 | Bölmə: Siyasət
Partiya sədri: “Belə çıxır ki, ABŞ Minsk qrupunun dirçəldilməsi üçün Azərbaycana təzyiq göstərə bilər”

“44 günlük Vətən müharibəsində Azərbaycanın əldə etdiyi möhtəşəm qələbə, torpaqlarımızın əhəmiyyətli hissəsinin erməni faşistlərindən azad edilməsi türk düşmənlərinə rahatlıq vermir. Özlərini “dünya ağası” hesab edən, dünyanın hər yerini özlərinin mənafe zonası sayan ABŞ başda olmaqla, bəzi Qərb dövlətləri Azərbaycanın qələbəsi nəticəsində regionda yaranmış yeni reallıqları qəbul etmək istəmirlər. Ermənidən daha çox erməni olan, ənənəvi türk düşmənçiliyi mövqeyindən çıxış edən bu dövlətlər sərgilədikləri anti-Azərbaycan və anti-Türkiyə mövqeləri ilə əslində ermənilərdən daha çox öz mənafelərini düşünürlər, hər vəclə Azərbaycanın qələbəsinə kölgə salmağa çalışırlar”.

Bu sözləri Reyting.az-a Təkamül Partiyasının sədri Teyyub Qənioğlu deyib.

Onun sözlərinə görə, həmin qüvvələr etimadı doğrulda, üzərinə götürdüyü öhdəlikləri yerinə yetirə bilməyən Minsk qrupunu yenidən gündəmə gətirməklə Azərbaycana təzyiq etməyə çalışırlar. T. Qənioğlunun fikrincə, ABŞ dövlət katibinin Avropa və Avrasiya məsələləri üzrə köməkçisi Kerri Donfridin İrəvanda söylədikləri fikirlərə başqa cür qiymət vermək mümkün deyil: “ABŞ rəsmiləri bilməmiş deyillər ki, Azərbaycan Respublikasının Prezidenti İlham Əliyev dəfələrlə bəyan edib ki, Dağlıq Qarabağ probelmi həll edilib, belə problem mövcud deyil, ermənilərə heç bir status verilməyəcək, Minsk qrupu mövcud deyil, Azərbaycan öz ərazisində ikinci erməni dövlətinin yaradılmasına imkan verməyəcək və s.”.

Partiya sədri əlavə edib ki, Azərbaycanda olarkən “Dağlıq Qarabağ”, “Minsk qrupu”, “konflikt” ifadələrini işlətməyə cəsarət etməyən ABŞ yetgilisinin Ermənistana çatan kimi “dili açılıb” və bəyan edib ki, Azərbaycan Minsk qrupunun həmsədrliyi prosesini dəstəkləmir, Birləşmiş Ştatlar isə dəstəkləyir.

T. Qənioğlunun sözlərinə görə, Ukraynada Rusiya ilə ölüm-dirim mübarizəsinə başlayan ABŞ öz rəsmisi vasitəsilə bəyan edir ki, Ukraynadakı müharibə səbəbindən Rusiya ilə münasibətləri kəssə də, ATƏT-in Minsk qrupunda əməkdaşlığı davam etdirməyə hazırdır.

Partiya sədrinin fikrincə, belə çıxır ki, ABŞ bədnam Minsk qrupunun dirçəldilməsi üçün Azərbaycana təzyiq göstərə, 907-ci bədnam “düzəliş” kimi ikinci bir qətnamə qəbul edə bilər: “Buyurun, cənablar, əlinizdən gələni edin! Ancaq unutmayın, Azərbaycan keçən əsrin Azərbaycanı deyil! Azərbaycan öz süveren hüquqlarından vaz keçmək fikrində deyil! Azərbaycan heç kimin daxili işlərinə qarışmır və heç kimə imkan verməyəcək ki, onun daxili işlərinə qarışsınlar! Azərbaycanın yeganə istəyi beynəlxalq hüquq normalarına uyğun olaraq öz ərazi bütövlüyünü, süverenliyini tam təmin etmək, regionumuzda sülhə, barışa nail olmaqdır”.




Bölməyə aid digər xəbərlər
17-03-2024, 12:16 “Kompas” səmtini azıb

{sape_links}{sape_article}