Məmurlar kəndlilərə məxsus torpaq sahələrini zəbt edib - Deputat
Tarix: 02-06-2020 11:38 | Bölmə: Slayd
Məmurlar kəndlilərə məxsus torpaq sahələrini zəbt edib

“Təmsil etdiyim İmişli rayonunda örüş yerləri problemi var. Dünən İmişlinin Hacalmuradlı kəndində çəkilmiş bir videoya baxdım və məsələnin nə qədər acınacaqlı olduğunu bir daha gördüm. Bir tərəfdə döyülənlər, söyülənlər, digər tərəfdə isə pis vəziyyətdə qalan polis zabitləri və qan içində olan vətəndaş”.

Reyting.az
xəbər verir ki, bunu Milli Məclisin növbədənkənar iclasında çıxışı zamanı deputat Razi Nurullayev bildirib.

R. Nurullayev daha sonar deyib: “Örüş sahəsi olmasa, kəndli necə yaşaya bilər? Bu kəndli inəyini, qoyununu, keçisini harada saxlasın? İmişli böyük torpaq sahəsi olan rayondur. Amma əhali örüş yeri tapmır ki, heyvan saxlasın. Bəs nə ilə dolansın? Adına 10-15 sot torpaq sahəsi, yaxud bir “dırıngilet” maşın var, yardım ala bilməz, heyvan saxlamaq istəyir ki, dolanışığı olsun, örüş sahəsi yoxdur. Niyə yoxdur? Çünki, uğursuz torpaq islahatı nəticəsində bütün torpaqlar pay-püşt edilib. Adam var ki, adına 5000 hektar, 100, 200, 300, 500, 1000, 2000 hektar torpaq sahəsi var. Elə icarədarlar da var ki, onlar həqiqətən əkin-biçinlə məşğuldurlar. Amma elə sahələr var ki, sadəcə, çəpərlənib, nə istifadə edilir, nə də əkilib-becərilir. Özünün beş-on heyvanını saxlayır. O böyük və istifadəsiz torpaq sahələri kimə məxsusdur? Böyük əksəriyyəti Bakıdakı məmurlara, rayonda vəzifə tutanlara. Bəs kasıb nə etsin? Bu şəkildə torpaq islahatı hazırlayıb Prezidentə təqdim edənlər məsuliyyət hiss etməlidirlər”.

Məmurlar kəndlilərə məxsus torpaq sahələrini zəbt edib
R. Nurullayev

R. Nurullayevin sözlərinə görə, uzun müddət uğurlu torpaq islahatından danışılsa da, bu, sadəcə, gözə kül üfürmək olub:

“Kolxozların dağıdılmasına və torpaqların paylaşdırılmasına rəvac verənlər, Prezidentə bunu təqdim edib, tez-tələsik imzaya nail olanlar qoy məsuyliyyət hiss etsinlər. Biz torpaqlarla bağlı yeni qanunun hazırlanmasına başlamalıyıq ki, qalan əraziləri xilas edə bilək. Çıxış yollarından biri torpaq sahiblərinin və icarədarların qeyri-qanuni, rüşvət və vəzifə səlahiyyətlərindən istifadə edib sahib olduqları torpaqların heç olmasa, 30-40 faizindən könüllü şəkildə imtina edərək xalqa qaytarmasıdır.

İmişlinin yeni icra başçısı cənab Elçin Rzayev, yaxud digər rayonlara təyin edilən yeni başçılar təkbaşına işləyə bilməzlər. Onlar Prezidentin tapşırıqlarını yerinə yetirməkdə böyük çətinliklə üzləşəcəklər. Biz torpaqlarla bağlı qanunvericiliyə dəyişiklik etməklə, onlara da kömək etmiş olarıq”.

Reyting.az




Bölməyə aid digər xəbərlər
{sape_links}{sape_article}