Əməkdar artist Röya Ayxanın keçmiş həyat yoldaşı Anar Cəlilovun "Bank Standart"dakı

hesabından külli miqdarda pul çıxarılıb.
Reyting.az big.az-a istinadən xəbər verir ki, bu barədə Anar Cəlilov özü məlumat verib. A.Cəlilov bildirib ki, "Bank Standart"ı məhkəməyə verib:
"Bakı Apellyasiya Məhkəməsinin "Bank Standart”ın mənafeyi çərçivəsində "fəaliyyəti”...

Mən, Anar Cəlilov bildirmək istəyirəm ki, "Bank Standart"da mənə və yaxın qohumlarıma məxsus bank hesablarından bizim razılığımız olmadan külli miqdarda (milyonlarla) pul vəsaitinin başqa şəxslərin hesabına köçürülməsi halları baş vermişdir. Bu səbəbdən "Bank Standart"da olan hesablarımızdan bizim razılığımız olmadan kimlərin istifadə etməsi və həmin hesablardan külli miqdarda pul vəsaitlərinin kimlərin hesabına köçürülməsi barədə məsələlərin aydınlaşdırılması üçün Səbail Rayon Məhkəməsinə iddia ərizəsi ilə müraciət etmişdik və məhkəmənin qətnaməsi ilə bizim iddia tələblərimiz təmin edilib”.

A.Cəlilov deyib ki, Bakı Apellyasiya Məhkəməsinin hakimi İlham Əsədovun 02.03.2016-cı il tarixli qərarı ilə, Səbail Rayon Məhkəməsinin qətnaməsi əsassız olaraq ləğv edilib:

"Bank Standart"da mənə və yaxın qohumlarıma məxsus bank hesablarından bizim razılığımız olmadan külli miqdarda (milyonlarla) pul vəsaitinin kimlər tərəfindən çıxarılmasının aydınlaşdırılması barədə iddiamız rədd edilmişdir. Bununla da "Bank Standart" əməkdaşlarının bizə məxsus hesablarda olan pul vəsaitlərindən qanunsuz olaraq istifadə etməsi halları ört-basdır edilmişdir.

Bu hərəkətləri ilə Bakı Apellyasiya Məhkəməsi nəinki bizim hüquqlarımızı kobud şəkildə pozmuş, həmçinin aşkar şəkildə "Bank Standart" əməkdaşlarının qanunsuz əməllərini gizlətməklə, banka xidmət etdiyini təsdiq etmişdir”.

Zərərçəkən sonda qeyd edib ki, Bakı Apellyasiya Məhkəməsi rəhbərliyinin "Bank Standart"ın himayə etməsi ilə bağlı yayılan şaiyələrə inanmırlar.