Dünya nəhənglərindən bir olan "NVIDIA" şirkətinin baş direktoru Censen Huan süni intellektin bəşəriyyəti sarsıdacağı, insanlığı məhv edəndən sonra dünyanı ələ keçirəcəyi ilə bağlı deyilənləri yanlış hesab edir. Huanın sözlərinə görə, bununla bağlı narahatlıqlar var, lakin deyilənlər tamamilə ağlasığmaz, "son dərəcə qeyri-mümkün" görsənir.

Reyting.az-ın məlumatına görə, məşhur iş adamı bildirib ki, artıq o, "Terminator" tipli ssenarilərin real olmadığına, süni intellektin ehtimal edildiyi kimi, bəşəriyyətə təhlükə yaratmayacağına tam əmindir.

Huan vurğulayıb ki, süni intellektin məlumatı insan kimi anlamaq və verilən istənilən tapşırıqları yerinə yetirmək qabiliyyətinə malik ola bilən mükəmməl bir sistemə çevriləcəyinə şübhə etməsə də, o, bu texnologiyanın ağıllı insan səviyyəsində şüur qazanacağı ilə bağlı söylənilən bütün iddiaları rədd edir.

Məşhur "NVIDIA"-nın sahibi qeyd edib ki, yaxın illərdə dünya üzrə biliklərin 90 faizi süni intellekt tərəfindən generasiya olunacaq.

O, eyni zamanda süni intellekt modellərinin qəribə davranışları ilə bağlı hələ də davam edən son müzakirələrə toxunub. Huan deyib ki, bütün bunların yeganə səbəbi modellərin öyrəndiyi mətnlərdən irəli gəlir.

Huan sonra əminliklə bildirib ki, ümumiyyətlə, bu cür problemli əlamətlərə görə, qətiyyən narahat olmağa dəyməz.

Oqtay QORÇU