17:38 / 28-03-2024
Əməkdar artist vəfat edib
Bank kreditlərinin faizi əsaslı şəkildə azaldılmalıdır
Tarix: 05-05-2020 01:39 | Bölmə: İqtisadiyyat / Slayd
Bank kreditlərinin faizi əsaslı şəkildə azaldılmalıdır

“Təəssüf ki, koronavirus pandemiyası həm hər bir vətəndaşımızın həyat və fəaliyyətinə, müəyyən dərəcədə sağlamlığına, həm də, bütövlükdə ölkəmizin iqtisadiyyatına mənfi təsir göstərməkdədir. Yenə də, təəssüf ki, bu pandemiyanın nə vaxta qədər davam edəcəyini proqnozlaşdırmaq mümkün deyil. Bu haqda həm kifayət qədər nikbin, həm də bədbin proqnozlar var. Ancaq bunlar narahatlığa, xüsusilə də panikaya səbəb olmamalıdır. Ona tezliklə qalib gələcəyimizə əminəm”.

Bunu Reyting.az-a Azərbaycan Təkamül Partiyasının sədri, iqtisadçı-alim Teyyub Qənioğlu deyib.

Onun sözlərinə görə, pandemiya səbəbindən baş vermiş iqtisadi geriləmələri sonradan aradan qaldırmaq üçün Azərbaycanın kifayət qədər potensialı var.

İqtisadçı-alim bildirib ki, koronavirus pandemiyası bütün ölkələrin iqtisadiyyatına mənfi təsir göstərməkdə, iqtisadi böhrana səbəb olmaqdadir: “Böhranın həm xarici, həm də daxili səbəbləri var. Xarici səbəblər dövlətlərin öz sərhədlərini bağlaması, iqtisadi əlaqələrin minimuma endirilməsi ilə bağlıdırsa, daxili səbəblər, əsasən, ölkə iqtisadiyyatının, onun xarici iqtisadi əlaqələrinin strukturu, beynəlxalq əmək bölgüsündəki xüsusi çəkisi ilə ilə bağlıdır. Azərbaycan dünya iqtisadiyyatının bir subyekti olduğundan və xarici iqtisadi əlaqələr kifayət qədər geniş olduğundan ölkəmizin iqtisadi böhrandan çıxma sürəti və tezliyi təbii ki, xarici iqtisadi tərəfdaşlarının böhrandan nə vaxt çıxacaqlarından da müəyyən dərəcədə asılı olacaqdır”.

T. Qənioğlunun fikrincə, böhrandan tezliklə çıxmağın əsas yolu ölkə iqtisadiyyatının inkişafı üçün əsaslı, real islahatların sürətlə, ləngimədən həyata keçirilməsi sayəsində mümkündür: “Təəssüf ki, hələlik ölkəmizin iqtisadi inkişafında neft amili aparıcı rol oynayır və yaxın gələcəkdə də belə olacağı gözləniləndir. Məhz xam neftin dünya bazarında satış qiymətinin aşağı düşməsi ölkəmizdə baş verən iqtisadi böhranın əsas səbəbidir. Mənim proqnozlarıma görə, dünyada pandemiyanın mənfi təsirlərinin azalması meyli davam edərsə, iyun-avqust aylarında neftin bir barrelinin satış qiyməti 30-40 dollar arasında manevr edəcək, sentyabr ayından artmağa başlayıb ilin sonuna 60 dollara çatacaqdır. Ancaq bu bir proqnozdur. Hesab edirəm ki, böhrandan tezliklə çıxmağın əsas yolu qeyri-neft sektorunun, xüsusilə də emal sənayesinin, sürətli inkişafına nail olmaqdan keçir”.

T. Qənioğlu diqqətə çatdırıb ki, sürətli inkişafa nail olmaq üçün sahibkarlığın inkişafı qarşısında, xüsusilə regionlarda meydana çıxan süni əngəllikləri aradan qaldırmaq, sahibkarlıq fəaliyyətinə yerli icra strukturlarının əsassız müdaxilələrinə son qoymaq lazımdır: “Sahibkarlıq fəaliyyətinin maliyyə təminatının yaxşılaşdırılması üçün bank kreditlərinin faizi əsaslı şəkildə (məsələn 10-12%-dək) azaldılmalıdır. Bunun üçün bank sektoru üzərində məmur sahibkarlığına, bu sektorda inhisarçılığa son qoyulmalı, xarici ölkələrin banklarının Azərbaycana gəlmələri üçün əlverişli hüquqi əsaslar yaradılmalıdır”.

Partiya sədri diqqətə çatdırıb ki, dünyada və ölkəmizdə yaranmış vəziyyəti nəzərə alaraq, ölkəmizin ərzaq təhlükəsizliyinin təmin edilməsi üçün təxirəsalınmaz tədbirlərə də ehtiyac var. Bunun üçün kənd təsərrüfatı məhsullarının, xüsusilə taxılın, istehsalının artırılmasına xüsusi diqqət yetirilməli, kənd təsərrüfatı xammalı əsasında ərzaq məhsulları istehsal edən emal müəssisələrinin şəbəkəsinin, xüsusilə regionlarda, genişlədirilməsi diqqət mərkəzində olmalıdır. “Hesab edirəm ki, qeyd edilən istiqamətlərdə tədbirlərin həyata keçirilməsi 2021-ci ilin əvvəllərində ölkəmizin iqtisadi böhrandan çıxmasına imkan verəcəkdir”,- T. Qənioğlu bildirib.




Bölməyə aid digər xəbərlər
{sape_links}{sape_article}