Məşədi İbad “Tarixi-Nadir”i yarıyacan oxumuşdu, bəs Hüseynbala Mirələmov?
Tarix: 18-06-2019 16:43 | Bölmə: Slayd
Məşədi İbad “Tarixi-Nadir”i yarıyacan oxumuşdu, bəs Hüseynbala Mirələmov?

Təxminən 15 ilin söhbətdir. O vaxt da deputat-yazıçı Hüseynbala Mirələmovun bir kitabı barədə tənqidi məqalə yazmışdım.

Üç gün sonra ofisə gələndə, dedilər ki, səni axtarırdılar.

“Kim?”

“Ekstrasensə oxşayan 2 nəfər...”

Sonradan bildim ki, “ekstrasens qiyafəli” şəxslər Hüseynbala Mirələmovun dəstəkçiləri imiş. Növbəti gəlişlərində də məni tapmayıb ürəklərini baş redaktora boşaltmışdılar...

Deputat-yazıçının son müsahibəsi ilə rastlaşanda, onun da tarixi mövzulara müraciət etdiyinə dair açıqlamalarını oxuyub, artıq Hüseynbala Mirələmovun da, çağın dəbinə uyğun, ekstrasensliyə, ya da konspirologiyaya baş vurduğu qənaətinə gəldim.

“Tarixi çox diqqətlə öyrənirəm. Nadir şahın həyatından bəhs edən “Sonuncu fateh” romanını yazmışam. Nadir şah görkəmli Azərbaycan türküdür. Sonuncu Azərbaycan fatehidir ki, Hindistanı fəth edib. Hətta Çinə getməyə hazırlaşırdı, ancaq tale imkan vermədi. Yeganə hökmdardır ki, türk sultanlarına təriqət məsələsi ilə bağlı məktub yazaraq, sünni-şiə məzhəbini aradan götürməyi məsləhət edib. Çünki bu ideologiya sonradan yaranıb. Nəyə lazımdır axı, sünni-şiə məsələsi... Təəssüf ki, türk sultanları onun məktubuna soyuq cavab veriblər. Nadir şahı yatdığı çadırda öldürüblər. Mənə elə gəlir ki, onun öldürülməsi təriqət məsələsinə görə olub. Ancaq bu barədə yazmırlar. Şəxsi fikrimdir. Nadir şah təriqətin qurbanı olub”.

Yadımdadır ki, Üzeyir Hacıbəylinin qəhrəmanı “Tarixi-Nadir”i yarıyacan oxumuşdu. Hüseynbala Mirələmovun “tarixi çox diqqətlə öyrənərkən”, Nadir şah barədə salnamədən neçə səhifə oxuduğunu bilmirəm. Bəlkə də Mirzə Məhəmməd Kazım Mərvinin, yaxud “Aləm-arayi Naderi”nin nə adını eşidib, nə də üzünü görüb.

Təriqət və məzhəb məsələsinə gəlincə, “tarixi çox diqqətlə öyrənən” deputat-yazıçıya tövsiyə: indi qalın-qalın ensiklopediyalara müraciət etmək dövrü deyil, ən azı internetdə axtarış verib, bu iki anlayışın fərqli mənasını bilmək olardı.

Mətləbdən uzaqlaşmayım. Müsahibənin davamında deputat-yazıçı oxucunu “yeni tarixi kəşflər”i ilə tanış edir və bu açıqlamalardan sonra indiyədək dünyaya gəlmiş-dünyadan getmiş tarixçilər qəbirlərində çevrilirlər...

““İki şah, iki sultan” adlı trilogiya yazıram. Əsər XIV əsrdən başlayır. İlk dövlətin hökmranlığını yaradan Bürhanəddin olub. Hökmranlıq Bürhanəddindən sonra Uzun Həsənə, Uzun Həsəndən sonra isə Şah İsmayıl Xətaiyə keçir. Bunların hamısı bir-birinə qohumdur. Təsəvvür edin, tarixdə özüm üçün bir şey kəşf etdim. Qaraqoyunluların hökmdarı Cahan şah şair olub. İkinci Mehmet də şair olub... Sultan Səlim Yavuz da şair olub. Maraqlı kəşfim ondan ibarətdir ki, bunların hamısı şair kimi də tanınıblar”.

Hansı Bürhanəddin? Yəqin ki, Qazi Bürhanəddin. Amma o, hansı ilk dövlətin hökmranlığını yaradıb?.. Deputat-yazıçının başqa bir “kəşfi” tarix qədər köhnədir: 32 türk sultanından 28-nin divan yazması, Cahan şahın “Həqiqi” təxəllüslü şair kimi tanınması və s. xəbər tutan sonuncu şəxs, olsa-olsa, Hüseynbala Mirələmovun özüdür.
Amma deputat-yazıçı hələ də təəccübləndirməyə davam edir:

“Təsəvvür edin ki, qəhrəmanlarımdan təkcə Məhəmməd Şah Qacar hökmdardır”.

Məhəmməd şah Qacar, “tarix bilicisi”nin aləmində, yəqin ki, Ağa Məhəmməd şah Qacardır. Deputat-yazıçının nəzərinə çatdırım: necə deyərlər, cin ayrı, şeytan ayrı, Məhəmməd şah Qacar bu xanədanın 3-cü hökmdarı (1834-1848), Fətəli şahın nəvəsidir.

Lakin bu da son deyil.

“İki il bundan qabaq “Azərbaycan” qəzetində “Günəş ləkə götürməz” adlı məqaləm çıxdı. Həmin məqaləmdə belə cümlə var: “Şah İsmayıl Xətainin şübhəli əxlaq prinsipləri məni çox narahat etdi. Sən şair deyilsən, qardaş, hökmdarsan!”

“Günəş ləkə götürməz” məqaləsi 2 il öncə yox, 2013-cü ildə dərc olunub. Türk yazıçısı Rəha Çamuroğluna cavab ruhundadır. “Şübhəli əxlaq prinsipləri” dedikdə, nəyi nəzərdə tutduğunu, sözsüz ki, özündən başqa heç kim bilmir. Amma Hüseynbala Mirələmovun indi dilə gətirdiyi tənədən də “Günəş ləkə götürməz” məqaləsində əsər-əlamət yoxdur. Əksinə, həmin məqalədə “Şah İsmayıl Xətai, sadəcə, böyük dövlət adamı deyildir. O, bəlkə də, bundan daha çox bir filosof, bir şairdir. Pirdir. Mürşiddir”, – yazıb.

Dərinə getdikcə, müsahibədə o qədər “quş” üzə çıxır ki!

Odur ki, Hüseynbala Mirələmova bir tövsiyə də verim: yazıçılıq ağır yükdür, çəkə bilməyəcəyiniz yük. Siz elə bacardığınız işlə məşğul olun ki, sabah mətbuatda şəkliniz və adınız olan başlıq peyda olmasın. Məsələn, “Deputat bir quyuya daş atdı, 100 tarixçi çıxara bilmədi...”

Əziz RZAZADƏ
скачать dle 10.5фильмы бесплатно




Bölməyə aid digər xəbərlər
{sape_links}{sape_article}