Orta təhsildə biabrçı vəziyyət: abituriyentlərin 46.4 faizi imtahandan “2” alıb - Ekspertlər
Tarix: 24-06-2019 15:58 | Bölmə: Slayd
Orta təhsildə biabrçı vəziyyət: abituriyentlərin 46.4 faizi imtahandan “2” alıb

Dövlət İmtahan Mərkəzinin (DİM) nəşr etdirdiyi “Abituriyent” jurnalının 12-ci nömrəsində ölkə təhsili ilə bağlı acınacaqlı faktlar üzə çıxıb. Bəzi ekspertlər hazırda müzakirə predmetinə çevrilən builki abituriyentlərin verdiyi imtahanların nəticələrini mənfi qiymətləndirirlər.

Reyting.az
-ın xəbərinə görə, Azərbaycan bölməsində orta statistik abituriyent ana dili fənnindən test tapşırıqlarının 51.52, ədəbiyyatdan 44.38, riyaziyyatdan I, II qruplarda 33.39, III, IV qruplarda 36.27, fizikadan 40.05, kimyadan 36.49, biologiyadan 57.61, tarixdən 44.23, Azərbaycan tarixindən 41.45, coğrafiyadan 44.90, ingilis dilindən I qrupda 34.66, II, III qruplarda 40.33 faizinə düzgün cavab verib.

Rus bölməsində orta statistik abituriyent isə rus dili fənnindən test tapşırıqlarının 52.49, ədəbiyyatdan 47.55, riyaziyyatdan I, II qruplarda 37.49, III, IV qruplarda 37.09, fizikadan 44.24, kimyadan 41.68, biologiyadan 56.37, tarixdən 35.58, Azərbaycan tarixindən 35.74, coğrafiyadan 42.67, ingilis dilindən I qrupda 51.48, II, III qruplarda 53.23 faizini düzgün cavablandırıb.

Məktəb proqramının 42–67 faizi mənimsənilmir

Yenə həmin jurnaldan: “Abituriyentlərin cavab göstəricilərindən aydın olur ki, hər iki bölmədə orta statistik abituriyent fənlər üzrə testlərin yalnız 33-58 faizinə düzgün cavab verib. Test tapşırıqlarının məktəb proqramını tam əhatə etdiyini və qəbul imtahanında iştirak edənlərin məktəbin seçilən şagirdləri olduğunu nəzərə alsaq, belə qənaətə gəlmək olar ki, orta statistik məzun məktəb proqramının 42–67 faizini mənimsəmir. Bu isə ümumi təhsil müəssisələrimizin böyük qismində tədris prosesinin normal aparılmamasından, tələbkarlığın zəifliyindən, ən başlıcası isə müəllimlərin çoxunun peşəkarlıq səviyyəsinin aşağı olmasından və tədris prosesində yeni təlim üsulları və texnologiyalarından istifadə edə bilməməsindən irəli gəlir. Odur ki, bu sahədə həyata keçirilməsi vacib olan digər tədbirlərlə yanaşı, müəllimlərin müasir elmi əsaslarla ixtisasının artırılması, ali təhsil müəssisələrində pedaqoji kadrların hazırlanması səviyyəsinin yüksəldilməsi və gələcək müəllimlərə lazımi pedaqoji-metodiki bilik və bacarıqların aşılanması məsələləri diqqət mərkəzində olmalıdır. Qeyd olunanlarla yanaşı, abituriyentləri yüksək nəticələr qazanan qabaqcıl rayonların, məktəblərin, eləcə də öz yüksək nəticələri ilə fərqlənən müəllimlərin qabaqcıl təcrübəsi öyrənilməli və yayılmalıdır”.

“Statistika utancvericidir”

Orta təhsildə biabrçı vəziyyət: abituriyentlərin 46.4 faizi imtahandan “2” alıb
Etibar Əliyev

Təhsil eksperti Etibar Əliyev hesab edir ki, Dövlət İmtahan Mərkəzinin bu statistikası həqiqətən də utancvericidir. Onun fikrincə, ölkənin orta təhsilinin mühüm problemləri Emin Əmrullayev kimilərə tapşırılanda bundan artıq nəticə gözləmək sadəlöhvlük olardı:

“Ölkənin təhsilini xaricdə dil kursu keçənlərə tapşıranda necə olmalı idi? Təhsilin məhv edilməsində maraqlı olanlar: eşidirsinizmi! Orta statistik abituriyent fənlər üzrə məktəb proqramının 42-67 faizini mənimsəmir. Əmrullayev kimilərin arxasında duranlar yəqin ki, bu “möhtəşəm missiya”nı həyata keçirdiklərinə görə onlara dərin təşəkkür edəcəklər və ənam verəcəklər. Bu yaxınlarda təhsilin belə acınacaqlı vəziyyətdən çıxmasının yollarını göstərəcəm”.

“Abituriyentlərin 46.4 faizi 200-dən az bal toplayıb”

Orta təhsildə biabrçı vəziyyət: abituriyentlərin 46.4 faizi imtahandan “2” alıb
Kamran Əsədov

Məsələ ilə bağlı Reyting.az-ın suallarını cavablandıran təhsil eksperti Kamran Əsədov isə bildirib ki, 2018-ci il qəbul imtahanında I–IV ixtisas qrupları üzrə abituriyentlərin 46.4 faizi 200-dən az bal toplayıb. Bu, 2018/2019-cu tədris ili üçün ali və orta ixtisas təhsili müəssisələrinə tələbə qəbulu və ümumtəhsil müəssisələri üzrə buraxılış imtahanları nəticələrinin elmi-statistik təhlilinin nəşr olunduğu abutiriyent jurnalının 12 saylı hesabatında qeyd olunub:

“Qəbulda toplanılması mümkün olan maksimal bal 700-dür. 0-700 bal diapazonunu şərti olaraq (0-199), (200-299), (300-499), (500-700) intervallarına bölərək, ənənəvi “2”,“3”,“4”,“5” qiymətləri ilə analogiyasını yaratsaq, görərik ki, bu il abituriyentlərin 46.4 faizi imtahandan “2”, 18.4 faizi “3”, 23.6 faizi “4”, 11.7 faizi isə “5” qiymət alıb. Ötən il bu göstəricilər, uyğun olaraq, 48.7 faiz, 18.4 faiz, 22.9 faiz, 10.0 faiz olub”.

Təhsil eksperti qeyd edib ki, 2018-ci ildə “2” qiymət alanların faizi nisbətən azalıb, “3” qiymət alanların faizi dəyişməyib, “4” və “5” qiymət alanların faizi artıb:

“Təbii ki, qəbul imtahanlarında iştirak edən abituriyentlərin topladıqları balların paylanması strukturunda və qəbul planında baş verən dəyişikliklər qəbul olan abituriyentlərin ballarının paylanmasında da öz əksini tapıb. Qəbul olanların topladıqları balların 29.7 faizini “3”, 42.7 faizini “4”, 21.0 faizini isə “5” qiymət alanlar təşkil edib. Ötən il bu göstəricilər, uyğun olaraq 32.9 faiz, 44.4 faiz, 19.1 faiz olub.

V ixtisas qrupu üzrə ərizə verib qəbul imtahanında (cari ilin məzunları üçün tam orta təhsil səviyyəsi üzrə buraxılış imtahanında) iştirak edən və qəbul olan abituriyentlərin 5.2 faiznin topladığı bal 20-dən aşağıdır. Bu imtahanlarda toplanılması mümkün olan maksimal bal 90-dır. Qəbul olan abituriyentlər arasında 25-dən az bal toplayan yoxdur. Qəbul imtahanlarında iştirak edənlərin əksəriyyətinin imtahan nəticəsi (50–59) və daha aşağı bal intervallarında yerləşdiyi halda, qəbul olan abituriyentlərin nəticəsi əsasən (60–69) və (70–90) bal intervallarına daxildir.

Məlum olduğu kimi, cari ildə abituriyentlər iki dəfə imtahan vermək imkanı əldə ediblər. Eyni ixtisas qrupu üzrə hər iki imtahanda iştirak edən abituriyentlərin imtahan nəticələri təhlil olunarkən belə məlum olub ki, abituriyentlərin ikinci imtahandakı nəticələri birinci imtahandakı nəticələrindən nisbətən yaxşı olub və bu imtahanların hər ikisində iştirak edən abituriyentlərin nəticələri arasındakı fərqin orta qiyməti 2.66 bala bərabər olub. Abituriyentlərin təxminən 69-70 faizinin bu iki imtahanda əldə etdikləri nəticələri arasındakı fərq 50 baldan, 93-94 faizinin isə 100 baldan aşağı olub”.

Müsahibimiz onu da qeyd edib ki, nəticələr arasındakı korrelyasiya əmsalı 0.94-ə bərabər olub. “2018-ci ildə ali təhsil müəssisələrinə tələbə qəbulunun keyfiyyət göstəriciləri daha da yüksəlib. Belə ki, 2013-cü ilə nisbətən qəbul imtahanlarında 300 baldan çox toplayanların sayı 26,5 faiz, 400 baldan çox toplayanların sayı 35,1 faiz, 500 baldan çox toplayanların sayı 51,5 faiz, 600 baldan çox toplayanların sayı isə 81,3 faiz artıb.

Ali təhsil müəssisələrinin bakalavriat səviyyəsinə dövlət sifarişi yerləri 66 faiz artaraq 12 300-dən 20 500-ə çatdırılıb, ümumi qəbul planının 42 faizini təşkil edib. Ötən il bu göstərici 27 faiz təşkil edirdi. Ölkədə ali təhsil alma imkanları genişləndirilib, son 5 il ərzində qəbul olunan tələbələrin sayında 20.8 faiz artım olub, bu göstərici ötən il 41 mini ötüb.

Artım tendensiyası cari ildə təsdiq edilmiş qəbul planında da davam etdirilib, bakalavriat səviyyəsinə qəbul planı 48 506 nəfərə yüksəlib, yəni 6.4 faiz artıb”,- deyə K.Əsədov fikrini tamamlayıb.

Zaur ƏHMƏD
Reyting.az
скачать dle 10.5фильмы бесплатно




Bölməyə aid digər xəbərlər
{sape_links}{sape_article}