17:04 / 23-07-2019
Dollar neçəyə olacaq?
Kənd təsərrüfatı məhsulları kritik həddə bahalaşıb - Cədvəl
Tarix: 03-07-2019 13:03 | Bölmə: Slayd
Kənd təsərrüfatı məhsulları kritik həddə bahalaşıb

“Gündəlik istifadə etdiyimiz ərzaq və qeyri-ərzaq mallarının qiymətinin, habelə bir sıra xidmət haqlarındakı dəyişikliklərin ilk baxışdan hansı həddə olmasının elə də fərqində deyilik. Lakin konkret müqayisələr göstərir ki, tez-tez istifadə etdiyimiz ərzaq, qeyri-ərzaq malları və xidmətlər kəskin bahalaşıb. Bu isə insanlarımızın həyat səviyyəsinə əhəmiyyətli dərəcədə mənfi təsir göstərir”.

Bunu Reyting.az-a açıqlamasında iqtisadçı ekspert Nemət Əliyev deyib. Onun sözlərinə görə, qida rasionumuzda üstünlük təşkil edən məhsullardan olan kartof, soğan və kələmin bahalaşma səviyyəsindən heyrətə gəlməyə bilmirsən.

Ekspertin fikrincə, qiymətlər Bakı bazarları, habelə respublikanın kənd rayon bazarları üzrə müxtəlif olsa da, bu ilin may ayında 1 kq baş soğan orta hesabla 71 qəpikdən satılıb: “Halbuki, ötən ilin may ayında 1 kq baş soğan orta hesabla 46 qəpikdən alınıb-satılırdı. Deməli, baş soğanın hər kiloqram qiyməti bu il 54 faizdən çox bahalaşıb. Soğanın hər kiloqramına bu il 25 qəpik çox xərcləmişik. Cari ilin yanvarında soğanın qiymətində 6 faizdən bir az artıq səviyyədə ucuzlaşma qeydə alınsa da, sonrakı aylarda kəskin bahalaşma baş verib. Fevral ayında 15 faizdən çox, mart ayında 33 faizin üzərində qiymət artımı qeydə alınıb. Aprel ayında isə soğan 78,3 faiz bahalaşaraq kiloqramı orta hesabla 1 manat 7 qəpiyə yüksəlib (xaricdən gətirilən soğanın qiyməti 85 faiz artıb)”.

Bəzi şəxslərin ikinci çörək adlandırdığı kartofun qiymətinə gəlincə, N. Əliyev deyib ki, ötən ilin eyni dövrü ilə müqayisədə, bu ilin yanvar, fevral və mart aylarında orta hesabla 1,3 faiz nisbətində ucuzlaşıb: “Lakin apreldə bu məhsulun qiyməti 14,3 faiz, mayda isə 32 faizə yaxın bahalaşıb. Orta hesabla ötən ilin may ayında bir kiloqramı alıcılara 66 qəpiyə təklif olunan kartof bu ilin may ayında 87 qəpiyə satılıb. Yerli kartof 31 faizdən bir az çox, idxal olunan kartof isə 34 faizə yaxın bahalaşıb”.

İqtisadçı nəzərə çatdırıb ki, mart, aprel, may aylarında qiyməti kəskin bahalaşan ərzaq məhsullarından biri də ağ kələmdir. Belə ki, ötən il ağ kələmin orta aylıq satış qiyməti müvafiq olaraq 0,57; 0,56; 0,57 manat olmuşdursa, bu il 0,67; 1,09; 0,90 manat olub. Deməli, bu məhsulun qiyməti martda 17 faizdən çox, apreldə 95 faizə yaxın, mayda isə 58 faizə qədər bahalaşıb.

Kənd təsərrüfatı məhsulları kritik həddə bahalaşıb
N.Əliyev

İqtisadçı ekspert bildirib ki, bu ilin əvvəlində 10 ədədi 1,77 manata satılan toyuq yumurtası may ayının sonuna qədər 1,39 manata qədər ucuzlaşsa da, sonuncu qiymət ötən ilin may ayı ilə müqayisədə 25 faizdən yüksək olub:

“Xaricdən gətirilən suda bişmiş kolbasanın qiyməti cari ilin yanvar-may dövründə 16-20 faiz aralığında, idxal olunan sosiska və sardelkanın qiymətləri isə fevral-may dövründə 14-15 faiz intervalında bahalaşıb.

Buğda ununun qiyməti yanvarda 4 faizə yaxın, fefralda 8 faizə yaxın, mart və apreldə 9 faizə yaxın, mayda isə 10 faizə yaxın artıb.

Ötən ilin may ayında kiloqramı 5,02 manata satılan dondurmanın qiyməti bu ilin may ayında 18 faizə yaxın bahalaşaraq 5,92 manata yüksəlib.

Ötən ilə nəzərən bu ilin may ayında filtrli siqaretlərin qiymətlərində 24 faizdən çox, toz şəklində sintetik yuyucu vasitələrin qiymətlərində 17 faizə yaxın, məktəblilərin daha çox istifadə elədiyi flomasterlərın qiymətlərində 20 faizdən artıq, üz üçün qidalandırıcı kremlərin (qadınlar daha çox istifadə edirlər) qiymətlərində isə 56 faizə qədər bahalaşma qeydə alınıb.

Bu ilin yanvar-may dövründə hər gedişhaqqına görə metrodan istifadə edərkən 10 qəpik çox, şəhər və şəhərətrafı avtobuslardan istifadə edərkən 11 qəpik çox, şəhərlərarası avtobuslardan istifadə edərkən 72 qəpikdən çox ödəniş etməli olmuşuq. Çünki gedişhaqqı bu il, ötən ilə nəzərən, metroda 50 faiz, şəhər və şəhərətrafı avtobuslarda 44 faiz, şəhərlərarası avtobuslarda isə 18 faizə yaxın bahalaşıb”.

N. Əliyev diqqətə çatdırıb ki, çoxişlənən malların, iş və xidmətlərin bahalaşma faizləri çox yüksəkdir: “Müqayisə üçün deyim ki, ötən ilə nəzərən, bu ilin yanvar-may aylarında nominal idadədə əhali gəlirləri cəmi 6,8 faiz artıb. Belə olan halda, aşağı səviyyəli gəlir artımlarının yüksək bahalaşma faizlərinin “yeminə” çevriləcəyi şübhəsizdir. Odur ki, gəlir artımlarının bahalaşma səviyyəsini üstələməsinə nail olmaq lazımdır və hökumət tədbirləri də məhz bu istiqamətə yönəlməlidir. Əks halda, əhalinin həyat səviyyəsinin yaxşılaşmasına iddia eləmək absurddur”.

Kənd təsərrüfatı məhsulları kritik həddə bahalaşıb

Z. ƏHMƏD
Reyting.az
скачать dle 10.5фильмы бесплатно




Bölməyə aid digər xəbərlər
{sape_links}{sape_article}