Türkiyə ilə Rusiya arasında gərginlik artır - Fotolar
Tarix: 20-02-2020 16:18 | Bölmə: Slayd
Türkiyə ilə Rusiya arasında gərginlik artır

“Türkiyə-Rusiya münasibətləri öz struktur tarixinə görə olduqca mürəkkəbdir və belə olaraq da qalacaq. Bu iki ölkənin ortaq maraqları ilə yanaşı ziddiyyətli maraqları da çoxdur. Amma indiki halda Rusiya Türkiyə ilə münasibətlərin daha da kəskinləşdirilməsinə getməyəcək”.

Bunu Reyting.az-a “Yeni Nəsl” Jurnalistlər Birliyinin sədri, siyasi şərhçi Arif Əliyev Suriyanın İdlib bölgəsinə görə Rusiya-Türkiyə münasibətlərində yaranmış gərginlikdən danışarkən deyib.

Arif Əliyevin sözlərinə görə, həm Rusiyanın daxili probelmləri, həm də kifayət qədər sıxıntılı iqtisadi vəziyyəti baxımından Türkiyənin ona açdığı imkanlar bu məsələdə rol oynayacaq: “Rusiya-Türkiyə münasibətləri hansısa mərhələdə yaxınlaşmış münasibətlər kimi ortaya çıxa bilər, amma münasibətlərin kökündə ziddiyyət də var. Rusiya və Türkiyənin həm Qafqazda, həm Yaxın Şərqdə, həm də digər sahələrdə qarşı-qarşıya dayanan maraqları çoxdur və bu, zaman-zaman iki ölkə arasında gərginliklərin yaranmasına gətirib çıxaracaq. Türkiyə və Rusiya bu yaxınlarda müttəfiq olduqlarını, bir sıra ortaq strateji maraqlarını göstərdilər. Amma bu münasibətlər hər zaman daxildə gərginlik, üzdə mehribanlıq formasında davam etməyəcək”.

Türkiyə ilə Rusiya arasında gərginlik artır
A. Əliyev

A. Əliyev hesab edir ki, taktiki yaxınlaşma ilə strateji baxışlar bir-birindən ayrı məsələdir. Onun fikrincə, Qafqazda, Yaxın Şərqdə, Orta Asiyada və İrana münasibətdə bu iki ölkənin bir-birinə zidd olan maraqları kifayət qədərdir.

Bununla belə hazırda Suriyanın İdlib bölgəsində gərgin durumun yarandığını xatırladan müsahibimiz bildirib ki, burada tərəflərin son anda necə davranacağı bəlli deyil: “Şəxsən mənim üçün Türkiyənin İdlibdə əməliyyatlara başlayıb-başlamayacağı, əgər başlayacaqsa bu zaman Rusiyanın da prosesə müdaxilə edib-etməyəcəyini proqnozlaşdırmaq çətindir. Hesab edirəm ki, indiki gərgin geosiyasi şəraitdə tərəflər müharibə haqqında düşünməzlər və buna getməzlər. Çıxış yolu kompromisin tapılmasıdır”.

Türkiyə ilə Rusiya arasında gərginlik artır

Qeyd edək ki, Türkiyə Silahlı Qüvvələri Suriyanın İdlib bölgəsində Bəşər Əsədə sadiq qüvvələrə qarşı hərbi əməliyyatlar keçirib.

Hökumətə yaxın mənbələr isə Rusiya hərbçilərinin Serakib, Neyrab və Maarat ən-Numan şəhərlərindən çəkilməyə başladıqlarını bildirib.

Reyting.az




Bölməyə aid digər xəbərlər
{sape_links}{sape_article}