Türkiyənin qərarı Avropa Birliyinin dağılmasını yenidən gündəmə gətirəcək - Fotolar
Tarix: 04-03-2020 16:34 | Bölmə: Slayd
Türkiyənin qərarı Avropa Birliyinin dağılmasını yenidən gündəmə gətirəcək

“Türkiyə neçə ildir deyirdi ki, sərhədləri açacaq və qaçqınların Avropaya getməsinə mane olmayacaq. Amma Avropa Birliyi Türkiyənin həyacanlı narahatlığını bölüşmürdü. Hətta Avropa Birliyi qaçqınları saxladığına görə Türkiyəyə verməli olduğu iki milyard avroya yaxın maliyyəni vermədi. Əksinə, son iki gündə Türkiyə qaçqınların üzünə sərhəddi açdıqdan sonra Avropa Birliyi Yunanıstana 700 milyon avro ayırdı ki, qaçqınlara qarşı sərhədlərini möhkəmlətsin”.

Bunu Reyting.az-a açıqlamasında professor Əli Abbasov Türkiyənin ərazisində yaşadığı suriyalı qaçqınların üzünə Avropa Birliyi ölkələri ilə sərhədlərini açmasını şərh edərkən deyib.

Əli Abbasov bildirib ki, Avropa Birliyi illər əvvəl Türkiyəyə verməli olduğu iki milyard avronu verməsə də, sərhəd açılan kimi Yunanıstana 700 milyon avro ödəyəcəyini bildirib.

Türkiyənin qərarı Avropa Birliyinin dağılmasını yenidən gündəmə gətirəcək

Professor əlavə edib ki, Türkiyə əvvəl-axır sərhəddi qaçqınların üzünə açmalı idi:

“Ərdoğan elan etdi ki, bu gün sərhəddə toplaşan 100 minlərin sayı sabah milyon ola bilər. Təbii ki, belə də olmalıdır. Başqa yol yoxdur. Ya Türkiyə bu sayda qaçqını köməksiz, heç bir dəstək olmadan saxlamalıdır, ya da sərhədlərini açmalı və Avropaya göstərməlidir ki, kömək göstərmirsinizsə, buyurun, qaçqınları qəbul edin. Axı, bu, Türkiyənin öz qaçqınları deyil ki, saxlasın. Qaçqınlar özü Türkiyədən tələb edir ki, onları buraxsın və sərhədlərini açsın. Türkiyənin də onları saxlamağa gücü yoxdur. Yəni burada hər hansı qanun pozuntusu mövcud deyil”.

Professor xatırladıb ki, Türkiyənin Yunanıstan və Bolqarıstan sərhədlərinə toplaşan qaçqınların bu ölkələrdə qalmaq niyyətləri yoxdur: “Qaçqınlar bu ölkələrdən istifadə edərək Avropanın içinə doğru hərəkət etmək niyyətindədirlər. Hesab edirəm ki, Avropa bu qədər qaçqını qəbul etməyə hazır deyil, amma maliyyə imkanları kifayət qədərdir və onları saxlaya bilər. Məsələn, Polşa, Macarıstan, Ruminiya kimi ölkələr qaçqınları saxlamaq istəmir və bunu açıq elan edirlər”.

Türkiyənin qərarı Avropa Birliyinin dağılmasını yenidən gündəmə gətirəcək
Ə. Abbasov

Ə. Abbasov qeyd edib ki, milyonlarla qaçqın axını Avropanın iqtisadi problemlərlə qarşılaşmasına səbəb olmasa da, siyasi problemlər yarada bilər: “Yəni Avropa Birliyinin dağılması haqda söhbətlər gedir. Qaçqın axını bu söhbətləri daha da qızışdıra və gündəmə gətirə bilər. Çoxları artıq bu barədə danışır. Artıq ümumi sərhədlərin olması bir sıra dövlətləri məmnun etmir. Həm də qaçqın axını Avropa ölkələrində millətçi siyasətçilərin güclənməsinə də təsir göstərir”.

Reyting.az




Bölməyə aid digər xəbərlər