17:38 / 28-03-2024
Əməkdar artist vəfat edib
Qarabağda aprel döyüşlərini təkrarlamaq lazımdır - Foto
Tarix: 02-07-2020 15:54 | Bölmə: Slayd
Qarabağda aprel döyüşlərini təkrarlamaq lazımdır

“ATƏT-in Minsk qrupunun təşəbbüsü ilə Azərbaycan və Ermənistan Xarici işlər nazirlərinin apardığı danışıqların əhəmiyyətini görmürəm. Zənnimcə, Minsk qrupu görüntü naminə belə dialoqlar təşkil edir. Yəni işlədiyini, fəaliyyət göstərdiyini nümayiş etdirmək istəyir. Soruşanda isə deyirlər ki, Qarabağ probleminin həlli ancaq sülh yolu ilə mümkündür. 30 ildir zəhləmizi tökürlər ki, problemin həlli sülhdən keçir, amma münaqişənin sülh yolu ilə həlli üçün bir iş görmürlər”.

Bunu Reyting.az-a siyasi şərhçi Elçin Şıxlı Azərbaycanın Xarici işlər naziri Elmar Məmmədyarov ilə ermənistanlı həmkarı Zöhrab Mnatsakanyan arasında videokonfrans formatında keçirilən görüşdən danışarkən deyib.

Onun sözlərinə görə, Minsk qrupunun həmsədrləri düşünürlər ki, Dağlıq Qarabağdan deyil, hətta Aran Qarabağdan bir rayon belə sülh yolu ilə Azərbaycana verilərsə, bu, Ermənistanın Baş naziri Nikol Paşinyanın devrilməsinə səbəb olacaq: “Devirirlər, qoy devirsinlər, bizə nə? Amma düşünmürlər ki, Azərbaycan siyasətçiləri “sülh” deməklə nüfuzdan düşür. Başqa sözlə, Avropa qorxur ki, Azərbaycanın işğal edilən ərazilərini qaytarsalar Paşinyanı devirərlər, amma biz narazı qalmağımızı, çoxsaylı insanın məcburi köçkün həyatı yaşamasını düşünmək istəmirlər. Məncə, bunu qurtarmaq, 2016-cı ilin aprel döyüşlərini, ermənilərə vurulan şapalığın bir nümunəsini də təkrarlamaq lazımdır. Onların təpəsini əzmədən nəticə əldə edə bilməyəcəyik”.

Qarabağda aprel döyüşlərini təkrarlamaq lazımdır
E. Şıxlı

Elçin Şıxlı əlavə edib ki, Ermənistanda hakimiyyətə demokrat, diktator və ya hərbçinin gəlməsinin mənası yoxdur: “Onların hamısı eynidir. Başqa sözlə, onlarla ancaq güc yolu ilə danışmaq lazımdır. Şükür Allaha ki, güclü ordumuz da var. Sadəcə, güclə siyasəti düzgün şəkildə və anında işlətmək lazımdır”.

Siyasi şərhçi sonda qeyd edib ki, Minsk qrupunu qandırmalıyıq ki, hər şeyin həddi-hüdudu olar. “Ermənistanda Paşinyanın devilməsindən qorxursunuzsa, Azərbaycan da sizin əməllərinizdən bezib. Daha yetər! Bu mənada nazirlərin görüşünü növbəti təmas kimi qiymətləndirirəm. Minsk qrupu da bu görüşdən sonra dəftərinə bir quş qoyur ki, işləyib, nazirləri bir araya gətirdik”,- E. Şıxlı əlavə edib.

Reyting.az




Bölməyə aid digər xəbərlər
{sape_links}{sape_article}