Sülhəddin Əkbər: “Rusiya Azərbaycana bir sıra güzəştlər təklif edə bilər”
Tarix: 14-04-2021 15:15 | Bölmə: Slayd
Sülhəddin Əkbər: “Rusiya Azərbaycana bir sıra güzəştlər təklif edə bilər”

“Azərbaycan və Rusiya arasında Şuşaya atılan “İsgəndər M” raketi ilə bağlı fəal dialoq gedir. Azərbaycan bu məsələdə mövqeyini ortaya qoyub və məncə, Bakı açıqlamasa da, tərəfdaşları ilə birlikdə hərəkət edir. Ehtiyac olarsa, bu məsələdə Azərbaycana siyasi-diplomatik dəstək də veriləcək. İndiki halda bu məsələ Azərbaycandan asılıdır. O mənada ki, Azərbaycan bu gərginliyi artıracaq, yoxsa münasibətlərin kəskinləşməsinə getməmək xəttini götürəcək. Yəqin ki, Azərbaycan bu məsələdə Rusiya ilə paralel olaraq əsas müttəfiqi Türkiyə də daxil olmaqla, tərəfdaşları ilə müzakirələr aparır. Sadəcə, dialoq qapalı kanallar vasitəsilə aparıldığından məlumatımız yoxdur.

Lakin dövlət başçısının son açıqlamalarından belə anlayıram ki, Azərbaycan mövqeyini sərt şəkildə ortaya qoyub. Mümkündür ki, Azərbaycanın sərt mövqedən çəkilməsi üçün Rusiya müəyyən güzəştlər təklif etsin”.


Bunu Şuşaya atılan “İsgəndər M” raketi ətrafında gedən müzakirələrdən danışan Azad Demokratlar Partiyasının sədri Sülhəddin Əkbər Reyting.az-a deyib.

Sülhəddin Əkbər bu məsələdə Rusiyanın Azərbaycana hansı güzəştlər təklif edə biləcəyini də açıqlayıb: “Bu, indiki halda Rusiya sülhməramlı qüvvələrinin nəzarətindəki ərazilərlə bağlı ola bilər. Eləcədə üçtərəfli razılaşmada olan maddələrin yerinə yetirilməsi ilə bağlı olması mümkündür.

Bildiyiniz kimi, üçtərəfli sazişdə bir sıra ciddi məsələlər hələ açıq qalıb. Həmçinin sülhməramlılar məsuliyyət zonasından kənara çıxırlar. Bu baxımdan Azərbaycana müəyyən güzəştlər ola bilər. Bu, məşhur sovet taktikasıdır. Özləri süni problem yaradır və sonra da həmin süni problemləri güzəşt kimi təklif edirlər”.

S. Əkbərə görə, güzəştlərdən biri də Ermənistan Silahlı Qüvvələrinin Azərbaycan ərazisindən çıxarılması ola bilər:

“Üçtərəfli sazişdə nəzərdə tutulmuşdu ki, Rus sülhməramlıları Ermənistan ordusu çıxdıqdan sonra əraziyə yerləşəcək. Amma onlar tam yerləşiblər, üstəlik, Ermənistan ordusu oradan tam çıxmayıb.

İkincisi, “Dağlıq Qarabağ Respublikası”nın sözdə “özünümüdafiə ordusunun” tərkisilah edilməsi məsələsidir. Bu problem də hələlik həllini tapmayıb.

Üçüncüsü, “Dağlıq Qarabağ Respublikası”nın fəaliyyətini davam etdirməsidir.

Eyni zamanda Ermənistan üçtərəfli sazişdə nəzərdə tutulan bəzi bəndlərin yerinə yetirilməsinə problem yaradır. Məsələn, Zəngəzur kommunikasiyası. Bunu sürətləndirmək olar.

Və ya Qırmızı Bazar-Xankəndi yolunun Azərbaycanın nəzarətinə verilməsi.

Azərbaycanlıların “sülhməramlıların” nəzarətində olan bölgəyə qayıtmasının sürətləndirməsi.

Burada çoxsaylı məsələlər var. Bu məsələlərdə Rusiya süni yaratdığı problemləri güzəşt kimi təqdim edərək Azərbaycanın “İsgəndər M”lə bağlı tutduğu mövqedən geri dönməsini istəyə bilər. Əks halda Rusiya çətin vəziyyətə düşəcək. Faktiki olaraq düşüb. Belə davam etsə, proses Azərbaycanın rəsmi mövqeyinə çevrilə bilər. Bu da Rusiya üçün arzuolunmazdır”.

Reyting.az




Bölməyə aid digər xəbərlər
bütün xəbərlər
{sape_links}{sape_article}