Eldar Həsənovun səhhəti pisləşib - Müraciət
Tarix: 01-08-2021 00:14 | Bölmə: Slayd
Eldar Həsənovun səhhəti pisləşib

Azərbaycanın Serbiyadakı keçmiş səfiri və ölkənin sabiq baş prokuroru Eldar Həsənovun vəkilləri dövlət başçısı İlham Əliyevə və Birinci vitse-prezident Mehriban Əliyevaya müraciət ünvanlayıblar. Onlar, Həsənovun səhhətinin ağır olması ilə əlaqədar onun barəsində həbs qətimkan tədbirinin dəyişdirilməsində köməklik göstərməyi xahiş edirlər.

Reyting.az
-ın “Turan”a istinadla verdiyi məlumata görə, vəkillər qeyd edirlər ki, bəlkə də bu müraciətləri “sonuncu dəfə”dir. Çünki Həsənovun vəziyyəti o qədər ağırdır ki, “növbəti dəfəyə ehtiyac qalmaya bilər”.

Müraciətdə qeyd edilir ki, Həsənov iyulun 2-də Dövlət Təhlükəsizliyi Xidmətinin Hərbi Tibb Baş İdarəsinin Hərbi Hospitalına yerləşdirilib. Bir sıra müayinələr, kolonospik müdaxilə (bağırsağından əməliyyat) aparılıb.

Vəkillər xatırladırlar ki, ölkə rəhbərliyinə əvvəlki müraciətlərində Eldar Həsənovun keçən ilin oktyabr ayından başlayaraq təkrarlanan başgicələnmələrdən, ayaqların tutulmasından və nəticədə yıxılmalardan şikayət etdiyini qeyd ediblər.

İndiyə kimi 170 dəfədən artıq belə yıxılmalar baş verib.

Vəkillərin Baş Prokurorluğa Həsənovun öz həkimləri tərəfindən müayinə olunması ilə bağlı dəfələrlə vəsatətlərinin əsassız olaraq təmin edilməməsi belə ağır fəsadlara gətirib çıxarıb.

Hospitalda müayinə zamanı onda paroksizmal pozision vertiqo, sol tərəfli diskogen boyun radikulopatiyası, diskogen lumbal radikulopatiya aşkar olunub.

Başgicələnmələrin və yıxılmaların səbəbi bu xəstəlik olub. Bu xəstəliyin vaxtında aşkara çıxarılmaması və adekvat müalicə aparılmaması (əslində bu xəstəliyin müalicəsi yoxdur, ağırlaşmanın qarşısını almaq üçün gündəlik profilaktikası vardır: dərmanlar, məşğələlər, fizioterapiya, müntəzəm açıq havada olma və s.) belə ağır nəticələrə gətirib çıxarıb.

Müntəzəm başgicələnmələr yıxılmalarla müşahidə olunur və istənilən növbəti yıxılmaların birində ağır fəsad baş verə bilər, - deyə vəkillər qeyd edir.

Onlar bütün bunları nəzərə alaraq, Prezidentdən və Birinci vitse-prezidentdən Eldar Həsənov barəsində həbs qətimkan tədbirinin dəyişdirilməsi ilə bağlı köməklik göstərməyi xahiş edirlər.

Müraciəti Cavad Cavadov, Adəm Məmmədov, Valeh Mehrəliyev və Cəlil Mirzəyev imzalayıblar.

Xatırladaq ki, Eldar Həsənov 2020-ci il avqustun 13-də Dövlət Təhlükəsizliyi Xidmətinin əməkdaşları tərəfindən saxlanılıb, növbəti gün məhkəmə onu sui-istifadə və büdcə vəsaitlərinin məqsəddən kənar xərclənməsi ittihamı ilə həbs edib.

Eldar Həsənov 2001-2020-ci illərdə Azərbaycanın Rumıniyada, daha sonra isə Serbiyada, Monteneqroda və Bosniyada səfiri vəzifələrini tutub.

1995-2000-ci illərdə o, Azərbaycanın Baş prokuroru vəzifəsində işləyib.




Bölməyə aid digər xəbərlər
{sape_links}{sape_article}