Müharibə Əfqanıstanın paytaxtına çatır: terrorçular müdafiə nazirini öldürmək istəyiblər - Fotolar
Tarix: 04-08-2021 14:00 | Bölmə: Slayd
Müharibə Əfqanıstanın paytaxtına çatır: terrorçular müdafiə nazirini öldürmək istəyiblər

Əfqanıstanda müşahidə olunan vətəndaş müharibəsi və hakimiyyət uğrunda savaş artıq Kabilə çatır. Bu gün səhər saatlarında paytaxt Kabildə güclü partlayışlar törədilib.

Reyting.az
xəbər verir ki, Kabil şəhərinin Sir Pur bölgəsində bomba yüklü avtomobilin partadılmasının əsas hədəfi ölkənin müdafiə naziri Bismillah Məhəmmədin evi olub. Evin qarşısında baş verən güclü partlayışın ardınca terrorçular bir evə daxil olaraq atəş açmağa başlayıb.

Ümumən ard-arda iki bomba partladılıb.

“Röyter” agentliyi Kabilin ən güclü şəkildə qorunan bölgəsində partlayış və hücumların azı üç mülki insanın həyatına son qoyduğunu bildirir. Əsasən əfqan siyasətçilərinin evinin yerləşdiyi Sir Purdakı küçələr dərhal qapadılıb. Əfqan təhlükəsizlik qüvvələri kimliyi açıqlanmayan 4 terrorçunu məhv edib.



Müdafiə naziri Məhəmməd hücum zamanı xəsarət almadan sui-qəsdən xilas olub, mühafizəçiləri isə yaralanıb. Daxili İşlər Nazirliyinin sözçüsü bəyan edib ki, ərazidəki evlər bir-bir axtarılıb.

“Röyter” xəbər verir ki, hücum və partlayışlardan sonra Kabil sakinləri küçələrə çıxaraq təkbir gətirib və əfqan hökumətini dəstəkləyən şüarlar səsləndiriblər.

ABŞ Dövlət Departamenti Kabildə baş verən partlayışları qınayıb. Bəyan edib ki, bu hücum son həftələr müşahidə olunan “Taliban”ın hücumlarına bənzərdir.

Səhər saatlarında daha bir partlayış Milli Təhlükəsizlik Birliyinin binası yaxınlığında baş verib və bina tamamilə dağılıb.

Bir neçə həftə ərzində Əfqanıstanın yarısını ələ keçirən “Taliban” Helmand vilayətində 40 mülki insanı öldürüb.

CCN kanalı isə bildirir ki, Helmand və Heratı ələ keçirən “Taliban” mülki əhalidən şəhərdən çıxmağı tələb edir.



Qeyd edək ki, ABŞ-ın bu ölkəni tərk etməsi ilə bir növ şərtlər dəyişib.

İyun ayından Rusiya 1979-cu ildə işğal etdiyi Əfqanıstanla bağlı hərəkətə keçib. Moskva bu istiqamətdə müttəfiqləri ilə birlikdə hərəkət edir. Tacikistan və Özbəkistanın Əfqanıstanla sərhədlərini gücləndirən Rusiya ərazidə hərbi təlimlər də keçirib.

Şanxay Əməkdaşlıq Təşkilatının toplantısında iştirak üçün Düşənbəyə gələn Rusiya müdafiə naziri Sergey Şoyqu bəyan edib ki, Əfqanıstandan yayılan təhdidlər sürətlə artır və Rusiya bölgə ölkələrinə dəstək verəcək.

“Xarci əsgəri birliklərin təcili geri çəkilməsi Əfqanıstandakı durumun sürətlə pozulması və terror fəaliyyətinin artmasına səbəb oldu. Bu durumda uyğun tədbirlərin görülməsi vacibdir”, - Şoyqu bəyan edib.

Özbəkistan və Tacikistanla sərhəddəki bütün məntəqələri ələ keçirən “Taliban”ın şərtləri dəyişməsi ilə Rusiya Tacikistana silahlar göndərir, rus ordusu hazırda tacik ordusuna təlimlər keçir.

Rusiya müdafiə naziri Kollektiv Təhlükəsizlik Müqaviləsi Təşkilatının üzvü olan Tacikistanı təhdid edən hər hansı bir duruma qarşı Rusiyanın hərbi qarşılıq verəcəyini elan edib.

Nazir Şoyqu eyni zamana Əfqanıstandan ayrılan ABŞ-ın Orta Asiyada hərbi bazalar qurmaq planının bölgəyə ancaq qeyri-stabillik gətirəcəyini düşünür.



Məlumat üçün bildirək ki, Özbəkistan və Tacikistanla sərhəd əraziləri nəzarətə götürən “Taliban” eyni zamanda İranla sərhəddəki İslan Kale və Pakistanla sərhəddəki Spin Boldak sərhəd-keçid məntəqələrinə nəzarət edir.

ABŞ müdafiə naziri Mark Milley əfqan ordusunun şəhər mərkəzlərini və ana yolları qorumaq üçün hərəkətə keçdiyini açıqlayıb. Bu arada ABŞ “Taliban” qüvvələrinə hava zərbələrini artırıb.

ABŞ “Taliban”ın son həftələrdə irəlilədiyi Qəndahara hava zərbələri endirir. “Taliban” bəyan edib ki, əməliyyatlar faktiki ABŞ-la əldə olunan anlaşmaların pozulmasıdır.

Reyting.az




Bölməyə aid digər xəbərlər
{sape_links}{sape_article}