Sərdar Cəlaloğlu: "AMİP heç vaxt müxalifətlə bir araya gəlməyib"
Tarix: 03-08-2022 18:40 | Bölmə: Slayd
Sərdar Cəlaloğlu: "AMİP heç vaxt müxalifətlə bir araya gəlməyib"

"Etibar Məmmədovun liderliyində guya blok yaradılacağı və bizim də orada iştirak edəcəyimiz haqda xəbərlərdən məlumatım yoxdur. Ona görə də bir söz demək çətindir. Onu da qeyd edim ki, belə bir blokun yaradılması üçün sosial sifariş də yoxdur. Məncə, kimlərsə Etibar Məmmədova ya pislik etmək, ya da "ayı xidməti" göstərmək üçün belə məlumat yayıb. Guya Etibar Məmmədov siyasətə qayıdır, onun ətrafında blok formalaşdırılır və s. Mənə elə gəlir ki, bunlar əsası olmayan məlumatlardır".

Bu fikirləri Reyting.az-a Azərbaycan Demokrat Partiyasının (ADP) sədri Sərdar Cəlaloğlu deyib.

ADP sədri qeyd edib ki, Azərbaycan müxalifətinin gerçək ittifaq yaratması lazımdır: "Amma hansısa partiyanı və ya sədri qabardaraq öncədən nəyisə elan etmək o deməkdir ki, belə birlik yarana bilməz. Niyə demirlər ki, Etibar Məmmədovun da iştirak edəcəyi blok yaradılacaq və blokda təmsil olunan siyasi qüvvələr özlərinə lider seçəcək? Amma deyirlər ki, Etibar Məmmədovun liderliyində ittifaq yaradılacaq. Belə təqdimat əslində həmin blokda təmsil olunacaq partiyaları öncədən təhqir etmək, eyni zamanda anti-demokratik yanaşmadır. Əlbəttə, bunlar siyasi etikaya zidd hərəkətlər və təcrübədə həyata keçirilməsi mümkün olmayan ideyalardır. Məhz buna görə də, adı ittifaqda çəkilən siyasətçilər məsələyə çox sərt reaksiya veriblər. Məncə, bu da hörmətli Etibar Məmmədovun xeyrindən çox, ziyanına işləyib".

S. Cəlaloğlu əlavə edib ki, onun təmsil etdiyi siyasi qüvvə heç vaxt Azərbaycan Milli İstiqlal Partiyası (AMİP) ilə əməkdaşlıq etməyib: "AMİP Elçibəy hakimiyyətinin devrilməsi zamanı müəyyən rola malik olub, amma bu prosesdə ADP AMİP-lə birlikdə olmayıb. 1998-ci il seçkilərində mövqelərimiz fərqli olub. Eləcə də 2000-ci il seçkilərində də. Yəni Azərbaycan siyasi həyatında çox ciddi hadisələr baş verib, amma bu hadisələrdə AMİP və ADP-nin mövqeləri 180 dərəcə fərqli olub. ADP hər zaman dövlətçilik prinsipini, milli maraqları əsas götürüb. Ona görə də bizim yaxınlaşmağımız baş verməyib.

İkincisi, AMİP-in ittifaqlara qoşulmamaq haqqında qərarı var. Bu qərarı əsas götürərək AMİP heç vaxt müxalifətlə bir araya gəlməyib. Bu gün də həmin qərar qüvvədədir. Bu baxımdan AMİP-in ittifaqa qoşulmaq şansı yoxdur".

Reyting.az




Bölməyə aid digər xəbərlər
{sape_links}{sape_article}