Böyük Britaniya ukraynalı ailələrə sığınacaq verməkdən imtina edir və onlara Ukraynanın “təhlükəsiz bölgələrinə” köçməyi məsləhət görürlər. Hətta həmin ailələrə partlayışların yaradacağı panik hücumların təsirlərini azaltmaq üçün uşaqlara səs-küyü ləğv edən qulaqcıqlardan istifadə də tövsiyə olunur.

Reyting.az xəbər verir ki, “Sky News” bu barədə bir neçə ukraynalı ailənin ifadəsinə istinadla yazıb.

Məlumata görə, sığınacaq verilməyən ailələrə deyiblər ki, müharibənin beşinci ilinə qədəm qoymasına baxmayaraq, Ukraynanın bəzi hissələri təhlükəsiz hesab olunur.

Qeyd edək ki, Rusiyanın 2022-ci ilin fevral ayında tammiqyaslı işğalından sonra təxminən 310.000 ukraynalı xüsusi viza proqramları çərçivəsində Böyük Britaniyaya gəlib. Xüsusilə, “Ukrayna üçün mənzil” sxemi Britaniya vətəndaşlarına Ukrayna vətəndaşlarını və onların ailə üzvlərini himayə etməyə imkan verib. Proqram iki dəfə uzadılıb və hazırda onların 2028-ci ilin sentyabr ayına qədər ölkədə qalmasına imkan yaradır.

Lakin əksər ukraynalıların statusunu daimi olaraq tənzimləmək üçün heç bir mexanizm yoxdur. Jurnalistlərin sözlərinə görə, bəzi ailələr sığınacaq üçün müraciət etsə də, imtinaların sayı artır. Ərizələrin əksəriyyəti 2025-ci ilin aprel ayına qədər təsdiqlənsə də, 2024-2025-ci illərdə bu rəqəm kəskin şəkildə azalıb.

Britaniya Daxili İşlər Nazirliyi imtina məktublarında müraciət edənlərə Qərbi Ukraynaya və ya Kiyevə köçməyi məsləhət görür. Ailələr vurğulayırlar ki, hətta bu ərazilər də mütəmadi olaraq raket və pilotsuz təyyarə hücumlarına məruz qalır.

V. QULİYEV