İran və ABŞ arasında Omanın vasitəçiliyi ilə keçirilən nüvə danışıqlarının üçüncü raundu İsveçrənin Cenevrə şəhərində başlayıb.

Reyting.az xəbər verir ki, İran mediasının məlumatına görə, danışıqlar yerli vaxtla təxminən saat 09:00-dan start götürüb.

Danışıqlar Omanın Cenevrədəki səfirliyinin iqamətgahında keçirilir.

Cenevrə danışıqlarında İran nümayəndə heyətinə xarici işlər naziri Abbas Əraqçi rəhbərlik edir, ABŞ tərəfini isə prezidenti Donald Trampın Yaxın Şərq üzrə xüsusi elçisi Stiv Uitkoff təmsil edir. Trampın müşaviri Cared Kuşner də ABŞ nümayəndə heyətinin tərkibindədir.

Danışıqlar Oman xarici işlər naziri Bədr bin Həmid əl-Busaidinin koordinasiyası altında aparılır.

Qeyd edək ki, 2025-ci ilin iyun ayında İsrail və ABŞ-nın İrana hücumları ilə dayandırılan İran və ABŞ arasında nüvə danışıqları, əsasən Türkiyənin, regional ölkələrin təşəbbüsləri və Omanın vasitəçiliyi ilə yenidən canlanıb.

ABŞ hücum təhdidlərini və kütləvi hərbi gücünü artırmağa davam edərkən, tərəflər 6 fevralda Omanda dolayı danışıqlar üçün görüşərək əlaqələri davam etdirmək barədə razılığa gəliblər. Danışıqlar daha sonra 17 fevralda Cenevrədə davam edib. Tərəflər danışıqlarda irəliləyişlər barədə məlumat veriblər və 26 fevralda Cenevrədə yenidən görüşmək barədə razılığa gəliblər.

İran atom bombası istehsalının qarşısını alacaq məhdudiyyətlər çərçivəsində nüvə proqramını davam etdirməsi müqabilində sanksiyaların ləğvini tələb edir. Digər tərəfdən, ABŞ Tehranın uran zənginləşdirmə fəaliyyətlərini tamamilə dayandırmasını və yüksək zənginləşdirilmiş uran ehtiyatını ölkədən çıxarmasını istəyir.

Danışıqlarda zənginləşdirmə dərəcəsinin məhdudlaşdırılacağı səviyyə, təxminən 440 kiloqramlıq 60 faizə qədər zənginləşdirilmiş uran ehtiyatının statusu və sanksiyaların ləğvi üçün cədvəl və yoxlama mexanizmləri müzakirə olunur.

V. QULİYEV