“SpaceX” şirkətinin sahibi İlon Mask 16 yaşdan kiçiklərin sosial media şəbəkələrinə girişini qadağan edəcəyini və administratorları üzərində qanuni nəzarəti artıracağını açıqlayan İspaniya baş naziri Pedro Sançezi hədəf alıb.

Reyting.az xəbər verir ki, Mask “X” sosial media hesabında Sançezin Dubay şəhərində keçirilən Dünya Hökumət Zirvəsindəki çıxışını paylaşıb və orada 16 yaşdan kiçik uşaqların sosial media şəbəkələrinə girişini qadağan etdiyini xatırladaraq, “Sançez əsl faşist totalitardır” və “çirkli Sançez İspaniya xalqına xəyanət edən bir zalım və xaindir” deyib.

Qeyd edək ki, Dubaydakı çıxışında Sançez sosial media platformaları üzərində nəzarəti artıracaqlarını və uşaqların onlara daxil olmasının qarşısını almaq üçün tədbirlər görəcəklərini açıqlayıb. O, həmçinin rəqəmsal platformalara nəzarəti artırmaq və administratorlarını bu şəbəkələrdəki pozuntulara görə məsuliyyətə cəlb etmək üçün addımlar atacaqlarını bildirib.

Sançez həmçinin Maskı tənqid edərək deyib ki, sosial media şəbəkələri “uğursuz bir dövlətin imicinin yaradılmasına cəhd edilən, qanunların qulaqardına vurulduğu, cinayətlərə dözümlü yanaşıldığı, dezinformasiyanın reallıqdan daha çox dəyərləndirildiyi və istifadəçilərin yarısının nifrət hücumlarına məruz qaldığı bir yerə” çevrilib.

Sançez əlavə edib ki, Maskın “özü də immiqrant olmasına baxmayaraq, İspaniya hökumətinin yarım milyon immiqrantın leqallaşdırılması ilə bağlı suveren qərarı barədə şəxsi hesabından dezinformasiya yaymaq üçün istifadə etdiyini” görəndə kədərləniblər.

Baş nazir 2025-ci ilin yanvar ayında verdiyi açıqlamada Maskı da hədəfə alaraq onu “yalan yaymaqla və qarayaxma kampaniyası aparmaqla “X” alqoritmini manipulyasiya etməkdə” ittiham edib.

V. QULİYEV