Bakıda "Azərbaycan Dəmir Yolları" QSC və "Rusagrotrans" QSC-nin birgə müəssisəsi olan "AzRusTrans" QSC Azərbaycanın yükgöndərənləri və yük sahiblərinə təqdim olunub.

Tədbirdə "Azərbaycan Dəmir Yolları" QSC-nin sədri Cavid Qurbanov, müavinləri Vüsal Aslanov və İqbal Hüseynov, "Rusaqrotrans" QSC-nin Direktorlar Şurasının üzvü Konstantin Zasov, QSC-nin Baş direktoru Yuri Kim və Direktorlar Şurasının sədri Oleq Roqaçov və digərləri iştirak ediblər.

"Azərbaycan Dəmir Yolları" QSC-nin sədri Cavid Qurbanov tədbir iştirakçılarına Azərbaycan dəmir yollarının uğurlu fəaliyyəti, Şimal-Cənub dəhlizi haqqında geniş məlumat verib.

C.Qurbanov bildirib ki, "Azərbaycan Dəmir Yolları" QSC və Rusiyanın taxıl yüklərinin dəmir yolu ilə daşımaları üzrə nəhəng operatoru "Rusaqrotrans" QSC Rusiya, Azərbaycan, İran, Gürcüstan və Türkiyə arasında yük dövriyyəsində dəmir yolu daşımalarının payını artıqmaq məqsədilə "AzRusTrans" QSC müştərək müəssisəsi yaradılıb.

C.Qurbanov qeyd edib ki, yeni QSC-nin fəaliyyəti sayəsində Azərbaycan dəmir yolları tərəfindən rekonstruksiya edilmiş nəqliyyat dəhlizləri, əsasən, Bakı-Tiflis-Qars və Şimal-Cənub dəhlizləri Rusiya, Azərbaycan, İran, Gürcüstan və Türkiyə arasında dəmir yolu daşımalarının həcmini artırmağa imkan verəcək.

"Rusaqrotrans" QSC-nin Direktorlar Şurasının üzvü Konstantin Zasov yeni yaradılan qurumun uğurlu fəaliyyət göstərəcəyinə inandığını deyərək, QSC-nin fəaliyyət istiqamətindən söz açıb.

Tədbirdə bildirilib ki, yeni QSC-nin fəaliyyəti ilə Rusiya-İran, Rusiya-Gürcüstan və Rusiya-Türkiyə istiqmətində taxıl daşımaları da daha perspektivli ola bilər.

"AzRusTrans" QSC Rusiya Federasiyasında və Azərbaycanda şəxsi qatar parkına sahib olan ən əsas operatorlatdan biri olmağa çalışan dəmir yol şirkətidir. QSC müxtəlif yüklərin, o cümlədən taxıl və digər aqrar yüklərin, meşə materiallarının, mineral gübrələrin, inşaat, konteyner və maye yüklərin daşınmasını təşkil edir. Şirkət Rusiya və Azərbaycan ərasizində limanlarda yükləmə-boşaltma da daxil olmaqla tranzit daşımalar sahəsində tam xidmət təqdim edir, çatdırma müddətlərini optimallaşdırır, vaqonların izlənməsini təşkil edir, məsləhət və gömrük xidmətləri göstərir, fitosanitar və baytar nəzarəti də daxil olmaqla lazımi sənədləri rəsmiləşdirir.