Məşhur yazıçı "Qış küləkləri" romanını bitirməyə tələsir
Tarix: 13-03-2025 08:30 | Bölmə: Mədəniyyət
Məşhur yazıçı "Qış küləkləri" romanını bitirməyə tələsir

Amerikalı yazıçı Corc Martinin dediyinə görə, indi onun yeganə arzusu "Qış küləkləri" adlı romanının çox tezliklə kitab kimi dərc olunmasıdır. Martin pərəstişkarlarını əmin edib ki, çoxdandır tamamlamaqdan ötrü əziyyət çəkdiyi "Qış küləkləri"ni yaxın vaxtlarda sona çatdıracaq.

Reyting.az
-ın məlumatına görə, məşhur yazıçı deyib ki, romanın üzərində iş kifayət qədər yaxşı gedir. Amma kitabın daha tez nəşr olunması üçün bir az həyəcan keçirir.

Amerikalı fantast yazıçısı, ssenarist, eyni zamanda kinoprodüser və redaktor, eləcə də bir çox ədəbi mükafatlar laureatı olan 76 yaşlı C. Martin deyib:

"Kitabı bitirməliyəm. Bu, həm də mənim nəzarətimdə olan əsas tək məsələdir. Büdcə məhdudiyyəti də yoxdur. Məni razı salmalı olduğum studiya rəhbərləri belə yoxdur. Yaxud daha da çox fərqli baxışları olan yazıçılar. Belələri yoxdur. Mənim görəcəyim iş isə ancaq kitab yazmaqdır".

C. Martinin bu təlaşının səbəbi məlum olmasa da, media bunu məşhur yazıçının ölüm qorxusu ilə də əlaqələndirir.

1970-1980-ci illərdə elmi fantastika, eyni zamanda qorxu janrı ədəbiyyatı və eləcə də fantastik janrlarda yazdığı hekayələri, romanları ilə şöhrət qazanmış yazıçı C. Martin 1996-cı ildən nəşr edilmiş "Buz və odun mahnısı" əsəri ilə kino aləmində də tanınıb. "HBO" studiyası Martinin "Buz və odun mahnısı" adlı romanının mötivləri əsasında "Taxt-tac oyunları" adlı məşhur serialı lentə alıb.

2011-ci ildən yazmağa başladığı kitabın üzərində işləyən, hələ də "Qış küləkləri" romanını (eyni zamanda seriyanın altıncı hissəsi) bitirməyən C. Martin həmçinin yeddinci və son hissə "Baharın xəyalları" əsəri üçün də planlarını hazırlayır.

"Buz və odun mahnısı" ədəbi tənqidçilərə Martini "Amerika Tolkien"i adlandırmağa əsas verib. Artıq ABŞ-nın ədəbi aləmində yaxşı tanınan qələm sahibləri, həmçinin tənqidçilər də etiraf edirlər ki, indi çoxlu sayda nüfuzlu mükafatlara sahiblənmiş bir yazıçı kimi C. Martin tənqidə deyil, daha çox tərifə layiqdir.

Onu da qeyd edək ki, 2011-ci ildə "Time" jurnalı C. Martini dünyanın ən nüfuzlu adamları siyahısına daxil edib.

Oqtay QORÇU




Bölməyə aid digər xəbərlər