21:05 / 12-07-2024
AFFA yeni qərarlar verib
Bayden və Zelenski 10 illik təhlükəsizlik sazişi imzalayıb - (Yenilənib)
Tarix: 13-06-2024 22:02 | Bölmə: Siyasət
Bayden və Zelenski 10 illik təhlükəsizlik sazişi imzalayıb - (Yenilənib)

ABŞ və Ukrayna prezidentləri Co Bayden ilə Vladimir Zelenski 10 illik təhlükəsizlik sazişi imzalamağı planlaşdırırlar. Sənəd Vaşinqtonu Kiyevə geniş spektrli hərbi yardım göstərməyə məcbur edəcək.

Reyting.az
“Washington Post”a istinadla xəbər verir ki, bunu ABŞ-nın milli təhlükəsizlik müşaviri Cek Sallivan deyib.

Bildirilir ki, keçmiş prezident Donald Tramp noyabrda keçiriləcək prezident seçkilərində qalib gəlsə belə, saziş gələcək ABŞ administrasiyalarını Ukraynaya dəstək vermək öhdəliyini götürmək məqsədi daşıyır.

Rəsmilər, razılaşmanın ABŞ daxilindəki siyasi parçalanmaları aradan qaldıracağına ümid etdiklərini deyiblər. Lakin onlar etiraf edirlər ki, Tramp və ya hər hansı gələcək prezident qanuni qüvvəyə malik icra sazişindən çıxa bilər. Çünki bu, müqavilə deyil və Konqres tərəfindən ratifikasiya olunmayacaq. Eyni zamanda, bu saziş Ukraynanın NATO-ya daxil olması perspektivləri ilə bağlı yeni öhdəlikləri nəzərdə tutmur.

“Biz nümayiş etdirmək istəyirik ki, Birləşmiş Ştatlar Ukrayna xalqının yanındadır, biz onların yanındayıq və təkcə sabah deyil, gələcəkdə də onların təhlükəsizlik ehtiyaclarının həllinə yardım etməyə davam edəcəyik”, - Sallivan bildirib. O, əlavə edib ki, Vaşinqton etibarlı müdafiə və çəkindirmə imkanlarını gücləndirəcək.

“Əgər Vladimir Putin Ukraynanı dəstəkləyən koalisiyadan sağ çıxa biləcəyini düşünürsə, yanılır”, - Sallivan qeyd edib.

Xatırladaq ki, Trampın bir çox seçki anketlərində Baydendən öndə olması razılaşmanın gələcəyini sual altında qoyur. Tramp bəzən Ukraynaya yardımın davam etdirilməsinə şübhə ilə yanaşır. O, israr edir ki, Avropa Kiyevə dəstək yükünü daha çox öz üzərinə götürsün.

Qeyd olunur ki, Baydenin bu sazişinə bu gün 15 ölkə - Böyük Britaniya, Fransa, Almaniya, İtaliya və bşaqları da qoşulacaq. Daha 16 ölkə nəticədə oxşar sazişlər bağlamağı öhdəsinə götürüb. Rəsmilər, ölkələrin yardım öhdəliklərini gələn ay Vaşinqtonda keçiriləcək NATO liderlərinin sammitindən başlayaraq koordinasiya etməyi gözləyirlər.

***

ABŞ prezidenti Co Bayden İtaliyada keçirilən “G7” sammiti çərçivəsində Ukrayna lideri Vladimir Zelenski ilə Vaşinqton və Kiyev arasında 10 illik təhlükəsizlik sazişi imzalayıb.

Reyting.az
xəbər verir ki, bu barədə “Reuters” agentliyi məlumat yayıb.

Bildirilir ki, tərəflər bu razılığa Ukraynanın NATO-ya mümkün üzvlüyünə körpü kimi baxır.

Sazişdə qeyd olunur ki, Ukraynanın təhlükəsizliyini təmin etmək üçün hər iki tərəf Ukraynanın Şimali Atlantika Müqaviləsi Təşkilatının standartlarına cavab verən əhəmiyyətli silahlı qüvvələrə, güclü imkanlara və hərbi sənaye kompleksinə davamlı investisiyalara ehtiyacı olduğunu qəbul edir.

Onu da qeyd edək ki, ABŞ Ukraynaya hərbi məhsullar, kəşfiyyat məlumatları, hərbi təlimlər, hərbi sənaye kompleksinin inkişafı ilə bağlı yardım göstərmək niyyətindədir.

Y. QACAR




Bölməyə aid digər xəbərlər
{sape_links}{sape_article}