Avropada həyəcan təbili çalınır: ölənlər və xəstəxanaya yerləşdirilənlər var
Tarix: 04-07-2025 11:51 | Bölmə: Slayd
Avropada həyəcan təbili çalınır: ölənlər və xəstəxanaya yerləşdirilənlər var

İtaliyada istilər səbəbindən Milan və Roma da daxil olmaqla 17 böyük şəhərdə ən sərt qırmızı siqnallar verilib, bir sıra bölgələrdə günortadan sonra açıq havada işləmək qadağan edilib.

Reyting.az
“Sky News”-ə istinadla bildirir ki, açıq havada işləmək qadağasına baxmayaraq Boloniya şəhərində bir fəhlə ölüb.

Bundan başqa, Sardiniya çimərliklərində 60 yaşdan yuxarı iki kişi, Siciliyanın paytaxtı Palermoda isə 53 yaşlı qadın gəzinti zamanı həyatını itirib. Yerli media onun ürəyində problem olduğunu yazıb.

Qeyd olunur ki, “səssiz qatil” adlandırılan isti dalğaları Avropada ildə minlərlə insanın həyatına son qoyur. Araşdırmaya görə, 2022-ci ilin yayında istilər səbəbindən Avropada 61 min insan həyatını itirib.

İtaliya Təcili Tibbi Yardım Cəmiyyətinin (SIMEU) rəhbəri bildirib ki, isti hava səbəbindən xəstəxanaya müraciət edənlərin sayında kəskin artım var.

İspaniyada temperatur daha da yüksələrək 46°C-ə çatıb. Səlahiyyətlilər bir neçə şəhərdə istidən ölənlərin olduğunu bildirirlər. Daha 300 nəfər xəstəxanaya yerləşdirilib.

Fransada yüzlərlə məktəb kimi Eyfel qülləsi də istilər səbəbindən bağlı qalır.

Bu arada Almaniyada yanğınsöndürənlər 40°C temperaturda Brandenburq və Saksoniya əyalətlərində meşə yanğınları ilə mübarizə aparırlar.

V. QULİYEV




Bölməyə aid digər xəbərlər