14:32 / 17-06-2025
Azərbaycan əhalisi artıb
12:54 / 17-06-2025
Sabah yağış yağacaq
İqtidar Qarabağ zəfərinin təsirini artırmaq üçün yeni kombinasiyalar qurur, radikallar isə...
Tarix: 09-09-2021 18:37 | Bölmə: Slayd
İqtidar Qarabağ zəfərinin təsirini artırmaq üçün yeni kombinasiyalar qurur, radikallar isə...

Ölkəmizdə fəaliyyət göstərən müxalifətin radikal qanadı uzun illər əsas fəaliyyətini Qarabağ üzərində quraraq mövcud hakimiyyəti ərazilərimizi işğaldan azad etməyi bacarmamaqda ittiham edir, fəaliyyətində bunu qabartmaqla özünün millətçi imicini yaratmağa çalışırdı. Açıq ifadə olunurdu ki, indiki hakimiyyət Azərbaycanın işğal altında olan torpaqlarının hətta bir qarışını da azad etmək iqtidarında deyil.

Amma bir il bundan öncə müxalifətin radikal qanadının söylədiklərinin tam əksinə şahidlik etdik. Azərbaycan Silahlı Qüvvələrinin Ali Baş Komandanı İlham Əliyev ordumuza işğal altında qalan ərazilərin düşməndən azad edilməsi əmrini verdi. İndiki iqtidarın zamanında tamamilə yenidən qurulmuş və modern silahla təchiz edilmiş ordumuz yağı düşmən üzərinə yeridi və 30 ilə yaxın müddətdə işğal altında qalan torpaqlarımızın böyük hissəsini cəmi 44 gün ərzində azad etdi. Həm də təkcə işğal altındakı ərazilər azad edilmədi, düşmən ordusu darmadağın olundu və Ermənistan ağ bayraq qaldıraraq döyüşlərin dayandırılması üçün ayrı-ayrı dövlətlərin başçılarına yalvarmaq məcburiyyətində qaldı. Bununla da həm Azərbaycanda, həm də bölgədə yeni siyasi reallıqlar yarandı. Hazırki vəziyyət isə bölgə dövlətlərinin Azərbaycanın mövqeyi ilə hesablaşmağı diqtə edir.

10 noyabr 2020-ci ildə müharibəyə son qoyan üçtərəfli razılaşmadan keçən 10 ayın müşahidəsi göstərir ki, Azərbaycan və Ermənistanda olan müxalifətin radikal qanadı tamamilə eyni arqumentdən çıxış edirlər.

Məsələn, Ermənistanda revanşist qüvvələr müharibənin bitmədiyini, ordunun yenidən qurulması kimi fikirlər səsləndirir. Azərbaycandakı radikal siyasi qanad da demək olar ki, eyni fikirləri fərqli formada təkrarlayır. Bildirirlər ki, “müharibə başa çatmayıb, torpaqlar azad edilməyib”. Bu halda ortaya ciddi suallar çıxır: əgər torpaqlar azad edilməyibsə, hazırda Laçın rayonunda Azərbaycan və Türkiyə ordusunun xüsusi təyinatlıları necə təlim keçirirlər? Və ya doğma Şuşada Xarı bülbül Musiqi Festivalı necə keçirilir? Əlbəttə, belə əsaslı suallar daha çoxdur.

Həm ölkəmizdə, həm də “mühacirətdə” olan radikal qanadın fəaliyyəti bununla bitmir. Məhz bu qanadın təmsilçiləri bir neçə gün əvvəl Azərbaycan-Türkiyə münasibətlərinə xələl gətirmək üçün hansısa yalan məlumatlar paylaşıblar. Amma sonradan Azərbaycan və Türkiyə ordusunun birgə hərbi təlimləri onların yanlış olduqlarını sübuta yetirdi.

Radikalların milli məsələ olan müharibə və müqəddəs torpaqlar mövzusunda da belə mövqedən çıxış etməsi, siyasi maraqları önə çəkməsinin hansı səbəblərdən qaynaqlandığı maraqlı nüans sayıla bilər.

Birinci nəticə budur ki, radikal qanadın son 30 ildə apardığı “bu hakimiyyət torpaqları azad edə bilməz” tezisi tamamilə darmadığın edilib və beləcə, işğal altında olmuş rayonların elektoratını özünə meylləndirmək niyyətinin üzərindən qırmızı xətt çəkilib.

İkinci nəticə budur ki, radikallar dəqiq müəyyən ediblər ki, 44 günlük müharibədə Azərbaycan dövlətinin qələbəsi var olduqca, onlar daha da zəifləyəcək və siyasi gündəmdən çıxacaqlar. Məhz bu səbəbdəndir ki, onlar Qarabağ qalibiyyətini mümkün qədər gözdən salmaq, Azərbaycan Ordusunun Böyük Zəfərinə hansısa siyasi çalar qataraq onun effektivliyini azaltmağa çalışmaqla mövcudiyyətlərini qorumağa çalışırlar.

Üçüncü nəticə budur ki, müxalifətin radikal qanadı və xaricdəki uzantısı həqiqətən də bölgədə baş verənlərin əsl mahiyyətini, reallıqları dərk etmir, dövlətin ay-küylə və isterika ilə idarə olunduğunu düşünürlər.

Ortaya çıxan nəticə budur ki, Azərbaycan iqtidarı növbəti mərhələdə Xankəndi şəhəri də daxil olmaqla, digər torpaqlarımıza nəzarəti əldə etmək üçün hərbi-diplomatik, siyasi-iqtisadi planlar və konfiqurasiyalar qurmaqla Laçın dəhlizinə qədər dərinliyə gedəcək kombinasiyalar qurur. Müxalifətin radikal qanadı və onun xaricdəki uzantıları isə deyəsən, hələ də 2020-ci ilin 26 sentyabrında ilişib qalıblar.

E. KAMAL
Reyting.az




Bölməyə aid digər xəbərlər