Milyarder məşhur rəssamın villasına köçür - Foto
Tarix: 21-08-2025 17:40 | Bölmə: Cəmiyyət
Milyarder məşhur rəssamın villasına köçür

"LVMH" moda holdinqinin rəhbəri Bernar Arno Parisdən Milana köçəcək. O, burada tarixi bina sayılan, həmçinin bir zamanlar dünya şöhrətli rəssam, ixtiraçı Leonardo da Vinçinin yaşadığı villada yerləşəcək.

Reyting.az
xəbər verir ki, bu barədə "Economy" nəşri yazıb.

Milanın mərkəzində yerləşən Atellani evi (Casa degli Atellani) intibah dövrünün nadir memarlıq nümunələrindən biridir. XV əsrdə inşa olunan bina 1498-ci ildə Milanın hersoqu Ludoviko il Moronun tərəfindən Leonardo da Vinçiyə hədiyyə edilib.

Hersoq rəssamın məşhur "Sonuncu şam yeməyi" əsərini görüb, daha sonra həm sarayını, həm də bu villanın yaxınlığındakı çox böyük üzüm bağını ona bağışlayıb. İllərdir xalq arasında bu iqamətgah "Leonardo da Vinçi villası" kimi tanınır.

İş adamı bu villanı 2022-ci ildə alıb. Milyarderə 1,3 milyon avroya başa gələn villada təmir işləri tam yekunlaşıb.



Fransız milyarder villanı şəxsi, hətta çox böyük ehtimalla özünün vergi rezidensiyasına çevirmək niyyətindədir. Bundan başqa, burada "LVMH" şirkətinin mədəniyyət mərkəzinin yaradılması, eyni zamanda qapalı tədbirlər, həm də moda nümayişlərinin təşkili də istisna olunmur.

Bildirilir ki, "LVMH" şirkətinə "Louis Vuitton", "Celine", eləcə də "Christian Dior" və "Givenchy, Fendi", həmçinin "Loewe", "Sephora" kimi digər tanınmış brendlər daxildir. Bu şöhrətli və nəhəng şirkətin rəhbəri kimi Bernar Arno isə dəfələrlə dünyanın ən varlı insanları siyahısına başçılıq edib.

Hazırda "Forbes" jurnalı bu fransalı iş adamının sərvətini 151,1 milyard dollar dəyərində qiymətləndirməklə, 9-cu yerə, "Bloomberg" isə 162 milyard dollarla 8-ci yerə yerləşdirir.

Oqtay QORÇU




Bölməyə aid digər xəbərlər
Dünən, 12:38 Sabah isti hava olacaq