Məhkəmə pedofil Ceffri Epşteynin varislərinə onun zorakılığının qurbanı olan qadınlara 35 milyon dollar təzminat ödəmək əmri verib.

Reyting.az-ın məlumatına görə, qərar ən azı 40 qadın da daxil olmaqla, bir qrup qurbanın bütün iddialarının həllni hədəfləyir.

Epşteynin keçmiş vəkili Darren İndik və keçmiş mühasib Riçard Kan ödənişlərin Epşteynin mirasından ediləcəyini açıqlayıblar.

Nyu-Yorkdakı federal hakim müqaviləni təsdiqlədikdən sonra proses rəsmiləşəcək. Sənədlərə görə, qrupda 40-dan çox qadın varsa, ödəniş 35 milyon dollar, qurbanların sayı az olarsa, 25 milyon dollar ödənəcək.

Bu müqavilə, illərlə davam edən məhkəmə proseslərindən sonra ABŞ tarixindəki ən səs-küylü qalmaqallardan birinin qurbanlarına maliyyə kompensasiyasının verilməsində son addım olacaq.

Xatırladaq ki, 18 yaşından kiçik onlarla qıza cinsi istismar etməkdə və fahişəlik şəbəkəsi yaratmaqda ittiham olunan Epşteyn 10 avqust 2019-cu ildə Nyu-York Manhetten Metropolitan Mərkəzi Həbsxanasındakı kamerasında ölü tapılıb.

“Epşteyn sənədləri”ndə keçmiş Şahzadə Endryu, ABŞ prezidenti Donald Tramp, keçmiş ABŞ prezidenti Bill Klinton, keçmiş İsrail baş naziri Ehud Barak, keçmiş ABŞ vitse-prezidenti Al Qor, aktyor Kevin Speysi, müğənni Maykl Cekson, illüzionist Devid Kopperfild, vəkil Alan Derşovitz və keçmiş Nyu Meksiko qubernatoru Bill Riçardson kimi məşhur adlar yer alıb.

V. QULİYEV