ABŞ-da tələbələr öz gələcəklərini qurmaq məqsədilə klassik proqramlaşdırma ixtisaslarından uzaqlaşmaqla, kütləvi şəkildə yeni süni intellekt sahəsinə yönəlirlər.

Reyting.az xəbər verir ki, bu barədə "TechCrunch" nəşri yazıb.

Kaliforniya Universiteti sistemində kompüter elmlərinə maraq son bir ildə 6 faiz, 2024-cü ildə isə 3 faiz azalıb. Bütün bunlar göstərir ki, bu proseslər ABŞ üzrə tələbə sayının ümumi artımı fonunda baş verir və süni intellekt texnologiyaları sahəsi artıq özünə "gələcək ABŞ ordusu" toplayır.

Mütəxəssislər bildiriblər ki, bu göstəricilərə əsaslanıb amerikalı tələbələrin digər mövcud texnologiya sahələrindən tamamilə imtina etməsi kimi yanaşmaq doğru deyil. Ekspertlərin fikrincə, əslində, ABŞ-da tələbələrin bu cür seçimi gələcəyi daha çox perspektivli olan süni intellekt ixtisaslarına keçiddir.

Məlumata görə, son zamanlar bu ölkənin universitetlərində neyron şəbəkələr və süni intellekt üzrə proqramlara tələbat çox sürətlə artır. Bu isə bir çox amerikalı valideynlərin övladları ilə bağlı yenidən qərar qəbul etməsinə səbəb olur. Hazırda tələbə valideynlərinin əksəriyyəti kodun avtomatlaşdırılması fonunda öz övladlarını klassik proqramçı kimi görmək istəmirlər.

Təqdim olunmuş yeni statistikaya əsasən, ABŞ-da valideynlərin əksəriyyəti bildirib ki, tələbə övladları süni intellekt texnologiyalarına üstünlük verir, üstəlik, mühəndislik sahələrinə yönəlmək üçün həvəslə çalışırlar.

Oqtay QORÇU