Ankrada baş vermiş dəhşətli terror aktına baxmayaraq, Türkiyə prezidenti Rəcəb Tayyib Ərdoğanın Azərbaycana nəzərdə tutulan səfəri təxirə salınmayıb.

Bu barədə Türkiyənin Azərbaycandakı səfirliyindən Musavat.com-a verilən məlumatda deyilir. Səfirliyin mətbuat xidmətindən bildirilib ki, hazırda səfər hazırlıqları öz normal axarıyla davam edir və prezident Ərdoğanın Bakı səfərinin təxirə salınması ilə bağlı heç bir rəsmi təlimat yoxdur.

Qeyd edək ki, R.T.Ərdoğanın martın 15-də Bakıda, Türkiyə-Azərbaycan Yüksək Səviyyəli Strateji Əməkdaşlıq Şurasının toplantısında iştirak edəcəyi bildirilir. Səfirlikdən verilən məlumata görə, Türkiyə prezidentinin günorta saatlarında Bakıya gəlişi, axşam isə dönüşü nəzərdə tutulub. R.T.Ərdoğan əvvəlcədən nəzərdə tutulduğu kimi, Yüksək Səviyyəli Strateji Əməkdaşlıq Şurasının toplantısına da qatılacaq.

Xatırladaq ki, Türkiyə prezidenti bundan əvvəl Ankaradakı 17 fevral terroru ilə əlaqədar bir gün sonra Bakıya nəzərdə tutulan səfərini təxirə salmışdı.