Qarabağ qazisinə süni ürək köçürülüb - Video
Tarix: 21-01-2021 17:38 | Bölmə: Xəbər lenti
Qarabağ qazisinə süni ürək köçürülüb

Qarabağ qazisinə süni ürək köçürülməsi əməliyyatı icra edilib. Artıq əməliyyatdan üç ay keçib və süni ürək köçürülən şəxs normal həyatını yaşayır.

Xocalı hadisələrinin canlı şahidi, Birinci Qarabağ müharibəsi qazisi Xəqani Səlimova “Ege Hospital”da süni ürək köçürülüb. Əməliyyatı ürək-damar cərrahı, deputat, t.e.d Rəşad Mahmudov icra edib. Əməliyyatda həmçinin “Ege” Universitetinin Tibb fakültəsi, Ürək-damar cərrahiyəsi kafedrasının müəllimi, ürək və damar cərrahı Prof.Dr Tahir Yağdı və “Ege Hospital” komandası iştirak edib.

Qarabağ qazisi Xəqani Səlimov 18 sentyabrda vəziyyətinin ağırlaşdığını, yaxşılaşmasına ümidi olmadığı üçün xəstəlik tarixçəsinə baxdıqdan sonra heç kimin onu qəbul etmək istəmədiyini bildirib. Daha sonra “Ege Hospital”a üz tutan qazinin sağalması üçün burada bütün imkanlar səfərbər edilib, ən kiçik bir şans belə qiymətləndirilib.

Qazini əməliyyat etməyə qərar verən Dr.Rəşad Mahmudov bu əməliyyatın sadəcə, bir insanın həyatının qurtarılması deyil, həm də başqa mənəvi dəyər daşıdığını qeyd edərək "Çünki bu, həm də Xocalıdan uzaq düşmüş Azərbaycan əsgərinin qayıtma şansını, ümidlərini doğrultma əməliyyatıdır”,- deyib.

Qazi əməliyyatın keçirildiyi ərəfədə həyatında əlamətdar hadisənin baş verdiyini, ilk nəvəsinin dünyaya gəldiyini və İkinci Qarabağ müharibəsinin başladığını bildirib. O, baba olmasının və Qarabağ döyüşlərindən gələn zəfər xəbərlərinin, bir gün yenidən uşaqlığının keçdiyi, böyüdü o torpaqlara qayıtma ümidinin onda yaşamaq üçün böyük stimul olduğunu qeyd edib.

Dr. Rəşad Mahmudov müayinə zamanı ürəyin gücünün 12-13 faiz olduğu və gələcəkdə canlılığın bərpası ilə əlaqədar heç bir ümidin olmadığı bir vəziyyətlə qarşı-qarşıya olduqlarını bildirib. "Hər nə qədər süni ürək transplantasiyası kimi imkanlar olsa da, bu xəstəmizdə ciddi infeksiyanın və sepsisin olması bütün bu şansları əlimizdən alırdı”,- deyən Rəşad həkim reanimatoloq Uzman Dr.Murat Asıliskender, infeksionist Uzman Dr.Nuri Beslen, terapevt Uzman Dr.Xəyyam Eyvazovun səyləri nəticəsində infeksiyanın, ürək çatışmazlığının nəzarət altına alındığını və xəstəni əməliyyata hazırladıqlarını qeyd edib.

Uğurlu keçən əməliyyatda planlaşdırılan sol mədəcik köməkçi cihazı problemsiz bir şəkildə implantasiya olunub. Sonrakı mərhələdə reanimasiya, əməliyyat sonrası periodu olub və bədənin bu cihaza adaptasiyası üçün vaxta ehtiyac yaranıb. İki həftəlik təqiblər sonrasında xəstə sağ-salamat evinə göndərilib.

Qazi Xəqani Səlimov əməliyyatdan öncə Rəşad həkimin ona dəfələrlə təkrarladığı "Sən Qarabağ qazisisən. Sən yaşayıb Xocalıda məni çaya qonaq etməlisən”,- sözlərini xatırlayıb. O, başda Dr.Rəşad Mahmudov olmaqla, yenidən həyata qayıtmasında rol oynayan hər kəsə öz minnətdarlığını bildirib. Əməliyyatdan sonra özünü 30 yaşındakından daha gümrah, güvənli hiss etdiyini bildirən qazi "İstəyirəm Azərbaycanda Rəşad həkimlər çoxalsın”,- deyib.

Rəşad Mahmudov Azərbaycan səhiyyəsinin, səhiyyəçisinin bu gün və gələcəkdə artan bütün imkanları ilə hər bir vətəndaşın, eləcə də əsgərin arxasında olacağını, onların sağlamlığının ən yüksək səviyyədə qorunmasına kömək edəcəyini bildirib.



Reyting.az




Bölməyə aid digər xəbərlər
{sape_links}{sape_article}