15:58 / 12-10-2019
Qarğış edən radikallar
Bakıda "Türk Şurası: Naxçıvan Sazişinin 10 illik yubileyi" mövzusunda beynəlxalq konfrans keçirilib
Tarix: 04-10-2019 16:19 | Bölmə: Siyasət
Bakıda "Türk Şurası: Naxçıvan Sazişinin 10 illik yubileyi" mövzusunda beynəlxalq konfrans keçirilib

Beynəlxalq Münasibətlərin Təhlili Mərkəzinin təşkilatçılığı ilə keçirilən konfransda Türkdilli Dövlətlərin Əməkdaşlıq Şurasına üzv və müşahidəçi ölkələrdən nümayəndələr, rəsmi şəxslər, deputatlar, “beyin mərkəzləri”nin rəhbərləri iştirak ediblər.

Reyting.az
-ın məlumatına görə, tədbirdə çıxış edən Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev bildirib ki, türkdilli dövlətlərin vahid təşkilatda birləşməsi ideyası hələ XIX əsrin sonlarında yaranıb: "1991-ci ildə Sovet İttifaqının dağılmasından sonra bu ideya reallığa çevrilməyə başladı. Hazırda ortaq tarix və ədəbiyyat kitablarının yaradılması barədə qərar qəbul edilib".

Ermənistan-Azərbaycan Dağlıq Qarabağ münaqişəsinə toxunan Fərid Şəfiyev bildirib ki, ermənilər işğal etdikləri Azərbaycan torpaqlarında maddi-mədəniyyət nümunələrini dağıdırlar: "Şuraya üzv dövlətlər bu məsələdə də birgə mövqe nümayiş etdirməlidirlər. Çünki bu abidələr türk xalqlarının ortaq dəyərləridir".

Türk Şurasının Baş katibinin müavini İsmət Gözəlov deyib ki, Türk Şurası müxtəlif sahələrdə əməkdaşlıq əlaqələrinin inkişafına töhfə verir. İndiyədək keçirilən görüşlərin mövzusu fərqli sahələri əhatə edib. Şuranın fəaliyyəti digər beynəlxalq təşkilatların fəaliyyəti ilə uzlaşır: "Bu il üzv ölkələrin birgə Ticarət və Sənaye Palatası yaradılıb. Hazırda birgə İnvestisiya Fondunun yaradılması barədə fikir mübadiləsi aparılır".

Xarici İşlər nazirinin müavini Ramiz Həsənov bildirib ki, Türk Şurası üzv dövlətlər arasında münasibətlərin genişləndirilməsi baxımında əhəmiyyətli platformadır: "Şura türk xalqlarının ortaq mədəniyyətinin və irsinin qorunmasında mühüm rol oynayır. Tarixi İpək Yolunun canlandırılması iqtisadi sahədə əməkdaşlığımızın prioritetlərindən birini təşkil edir".

Nazir müavini Naxçıvan Sazişinin türk dövlətləri arasında münasibətlərin möhkəmlənməsinə bundan sonra da böyük töhfələr verəcəyinə əmin olduğunu bildirib.

Tədbir “Türk Şurasının institutlaşmasının qarşısındakı problemlər və perspektivlər” və “Üzv dövlətlər arasında əməkdaşlığın perspektivləri” mövzularında panel iclaslarla davam edib.

Birinci paneldə çıxış edən Beynəlxalq Türk Mədəniyyəti və İrsi Fondunun prezidenti Günay Əfəndiyeva rəhbərlik etdiyi Fondun fəaliyyəti, gördüyü işlər barədə ətraflı danışıb. Bildirib ki, Fond qısa zaman ərzində türk dünyasının mədəniyyətini, zəngin tarixini, milli-mənəvi dəyərlərini əhatə edən müxtəlif layihələrə imza atıb.

Beynəlxalq Türk Akademiyasının (BTA) əməkdaşı Füzuli Məcidli təşkilatın prezidenti Darxan Kıdıralinin təbriklərini konfrans iştirakçılarına çatdırıb və bildirib ki, “Naxçıvan müqaviləsi” Türk xalqlarının bir neçə min illik tarixində bunadək heç zaman olmayan yeni bir eranın, yeni bir mərhələnin başlanğıcıdır. Bu sazişlə türk dövlətləri ilk dəfə könüllü şəkildə bir araya gəlib, beynəlxalq hüquqi əsasları, qarşılıqlı öhdəlikləri olan bir Birlik qurub və ilk dəfə ortaq bayrağa sahib olublar. BTA təmsilçisi qeyd edib ki, keçən 10 il müddətində Akademiya türkdilli dövlətlərlə bağlı mühüm layihələr həyata keçirib. Qısa müddət ərzində, “Ortaq Türk tarixi” dərsliyi çap olunub, “Ortaq Türk ədəbiyyatı” və “Türk dünyası coğrafiyası” dərsliklərinin proqram layihəsi üzərində işlər başa çatdırılıb, türk xalqlarının yazılı, maddi, mədəni və mənəvi irsinin nümunələrinin toplandığı böyük elektron multimedia fondu "Atalar Mirası" portalı təqdim olunub və “Türkbarometr” sosial araşdırmalar layihəsi reallaşdırılıb. Bundan başqa, təşkilat Monqolustandan Macarıstana qədər geniş coğrafiyada arxeoloji tədiqatlar həyata keçirməyə başlayıb.

Qeyd edək ki, konfrans çərçivəsində Beynəlxalq Münasibətlərin Təhlili Mərkəzi ilə Türkiyə Xarici İşlər Nazirliyi, Macarıstan Xarici Əlaqələr və Ticarət İnstitutu və Özbəkistan Prezidenti yanında Strateji və Regional Araşdırmalar İnstitutu arasında anlaşma memorandumları imzalanıb.
скачать dle 10.5фильмы бесплатно




Bölməyə aid digər xəbərlər
{sape_links}{sape_article}